يعتمد على الوضع المادي

يعتمد على الوضع المادي للزوج او للعائلتين ، و في النهاية هو تفاهم بين الطرفين ، انا و زوجتي من عوائل متمكنة مادياً و اثنينا نشتغل الحمد لله ، فسويناه في صالة و الصرف كان مناسب بالنسبة ليي ، بعض العوائل ما يناسبها ان تسوي في صالات فيكون خيار البيت افضل اليها .. و في النهاية هو مو عيب ولا غلط ان الواحد يسويه في بيت او في صالة او ماتم او اي مكان، المهم ان ما يضغط الواحد على روحه ويعيش في وسط الديون في السنوات اللي بعدها، و مهم يكون التفاهم بين الزوج وزوجته بدون تدخل العوائل.

امممممممممم

حفله الملجه في بيتنا في صاله بيتنا ولا مكان ثاني تلحطم ومعاير

في

بوفيه او لا عشان نجي نخمه

اي والله

اذا احد وجه لي دعوه عرس في بيت او غيره ما اروح الا في صاله او فندق ما ارتاح

عدال عاد هههه الا يشوف مسويه عرسش ف فندق عشان مسوية روحش كلش اي والله اذا احد وجه لي دعوة يافندق يامارتاح

سطح البيت للطيبيين

كانت أيام حلوة والناس تدخل وتطلع بطيبتها واللي موجود يقدعون فيه، وعلى بساطة التجهيز للزواج فوق السطح لكن الكل كان يحضر ويشارك الفرحة
بس سطح البيت هالأيام غير مناسب .. بقولون ازعجنا الجيران
والديرة ما فيها باركات مثل قبل
غير عن الحر اللي يفطسون فيه المعازيم ويخرب تسريحة ومكياج العروس وفوق هذا أغلب البيوت ما تتحمل .. اذا ما طاح السطح على الناس
واللي بيته جديد عليه بالعافية يسوي عرس العايلة كلها فيه

99% من الي يقولون اقتصاد وووووالخ هذا يطلبونه فقط لين يتزوج ولدهم. . أما وقت زواج بتهم يكسرون ظهر الأوادم. . ولا عاد بنات شارع البديع شايفين نفسهم وافكرون روحهم بنات الروشة

العرس كلما كان بسيط و متواضع كلما كان احلى .. لكن من يسمع

انا مستعد اقبل ادفع 5000 دينار لزوجة بحرينية بشرط ألا تطلب فلس احمر واحد أكثر من هذا المبلغ ولأي سبب كان
إذا في بنت تقبل مع اهلها بمبلغ ال 5009 دينار انا مستعد بس لا تطلب من أي فلس ولأي سبب يعني المبلغ شامل كل شي يعني اعطيها المبلغ ولا اروح لا سوق ولا حتى كوافير شاااااامل إذا في فعلا وبدون لف ودوران ساعدونا أو الأجنبية أسهل

بنات هالديرة طل يقبلون ب 5000

اغلب الردود .. يتظاهرون بالمثاليه والمنطق والكلام اه ايام اول وغيره من الكلام .. والواقع والتفكير شيء اخر ????

على شريك المستقبل وين يبي راح نتفق اكيد , افضل حفلة عائلية فقط بدون فشار و ناس في النهاية تتكلم وتعقر للأسف

لنبي صلى الله عليه وآله وسلم يقول : زفوا عرائسكم ليلًا وأطعموا في النهار .
حلاته العرس في الليل والرومنسية مسيطره على الأجواء .. وحتى المكياج وقته أطول .. بعدين المعارييس يتعشون وينامون ..

بحراني

خالتي حفلتها كانت فوق سطح بيت رجلها قبل عشر سنوات تقريبا والله كانت بسيطة وجميلة والقلوب على بعضها

هناك مآتم او صالات للمآتم كبيرة تتسع لجميع المعازيم أرخص تناسب ميزانية المعرس والفائدة للماتم والله يطرح البركة

دمدومة

مو كل شي نبيه نحصله احنا البنات دايما نكون خاطري وخاطري وخاطري احنا بنات اكيد بيدخل بخاطرنا بس بالنهايه القناعه الاساس حق صاله او سطح او فندق ....عن نفسي مالي مزاج سندارة العرس وعوار الراس ابي نملج عند الشيخ ونطير بفلوسنا لا باكل فلان ولا علانه بياكلون وبيتطنزون وبيمشون بس خوات العروس وخوات المعرس وخلاتهم وعماتهم بيستانسون اما الباقي بيطنزون وبحشون والله...

الواقع

أماكن الزواج اخذت بتدريج تتطور منذ القدم في البيوت ثم فوق السطح ثم في المواتم ثم في الصلات المخصصة للزواج وفنادق خمس نجوم وانا في الوضع الحالي أفضل الصالات المخصصة للزواج

مواطن

أنا سويت الحفله في في حوي بيت جدي القديم وكان الكل مستانس وسويت لي مسرح من عل سعف بعد من صنع أقربائي الأحبه

لكل زماااان اللي يناسبه
قبل كان شي عجيييييييييييييب الاعراس فوق السطوح ونزينها بالخلق الاخضر والوردي والسناحات الجميلة
والقسام كان سكسبال وعصير وحلوى وخبز خمير
بس للامانة كان حر وفطسة عدل
وناس سطوحهم صغيرة
يعني مو معقولة الحين احد بيسوى فوق السطح ويا الحر وروائح المسيلات وغيره والازعاج
بالعقل يعني
لو كان عندي سويت عرسي في صالة حليوة او فندق

النفخه والفشار مامنه فايدة

النفخه والفشار مامنه فايدة كلما كان الشي بسيط كان افضل ليش الاسراف والتبذير كل شي بالمطالع اذا البنت ماتبي الاهل يبون والعكس اكو فلانه سوت عرسها في الفندق الفلاني واكو فلانه راحت في الفندق الفلاني اصحي يابنية ويا الاهل يللي تتطلبون في النهاية بنتكم بتنصم وي زوجها غارق في الديون وانا احرض لصبيان اي بنية تتقدم ليها وتتطلب خلها تخيس في بيتهم تعنس ولا تغرق روحك في الديون على حساب ليلة وحدة خل فلوسك ليكم تفيدكم افضل من التبذير والاسراف

القناعة تعني ترويض النفس على الإكتفاء بالمسائل الضرورية والتي لا يمكن الإستغناء عنها، وكبح جماحها عمّا سوى ذلك.
شكا رجل إلى أبي عبد الله عليه السلام أنّه يطلب فيصيب فلا يقنع، وتنازعه نفسه إلى ما هو أكثر منه، وقال: علّمني شيئاً أنتفع به، فقال أبو عبد الله عليه السلام : "إن كان ما يكفيك يغنيك فأدنى ما فيها يغنيك، وإن كان ما يكفيك لا يغنيك فكلّ ما فيها لا يغنيك".
والقرآن الكريم يربّي الإنسان على عدم الطمع بما في أيدي الغير فيقول: ﴿وَلَا تَمُدَّنَّ عَيْنَيْكَ إِلَى مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنيَا﴾.
سئل أمير المؤمنين عليه السلام عن قوله تعالى: ﴿ومَنْ عَمِلَ صَالِحًا مِّن ذَكَرٍ أَوْ أُنثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً﴾ فقال: "هي القناعة ".

اني ماتشرطت على زوحي لا ف مهر ولا في صالات
الملجه كانت بسيطه ف بيتنا
و الزواج في صاله رخصيه ماكلفت حتى ١٥٠
والحمدلله مستانسه واراعيه ماحب الفشخره والخساير

وسبحان الله قاعده تفوشرين بالقناعة قدام العلي والبنعلي

يا حظه زوجش
الله يديم المحبه بينكم ويخليكم لبعض

"من قنع بما رزقه الله فهو أغنى الناس"

الحمدلله مارضيت زوجي ياخذ قرض يوم بنتزوج وساعدته مني ومناك
شوي عليي وشوي عليه ومشت الأمور

هي ليلة وحدة الرجال يقعد يجمع له سنين علشان يصرف هالفلوس على الناس وعشاهم واكلهم جي يصرف عليهم .حفلة في البيت ولفلوس يسافرون ابها لكن بنات هالزمن زمن التبرج مخوخ مدستره

اهمشي القناعة والبساطة والاخلاق بالحياة اهم من هالاشياء الكمالية وعقب لازم افكر بطريقة ايجابية وشلون لو سويت هالاشياء بتعود عليي بالمستقبل يعني لا يمكن اني اخلي زوجي المستقبلي يتورط بديون واكلفه فوق طاقته عشان فرحة ساعتين ِِِِ واتمنى البنات يعيدون النظر في اشيا اهم من هالشي م

قاعد افكر في يخت .. بس مو لاقي اللى يناسبني

الله على ايام قبل الاعراس كله فوق السطح والهوى الطلق مو الحين املوعين جبدنا وما عرفوا الا الصالات

محرقي بحريني
ههههههههه اقطع الله ابليسكم من يسوي الحين في السطح الحين اقل شئ في صاله او خيمة
الحين لو واحد يسوي في سطح بيطيحون فيه مطنزه
وثاني شئ من المكفخه اللي بترضه يسون عرسها في سطح
كلش كلش اذا افلسين بتحنه وتسافر اي ديره رخيصه او بتروح العمره

عادي في اي مكان بسيط . لانه في رايي لا احب الفخفخه . الحمد الله رب العالمين .

سلام

زمن الأسطح ولى والأكثرية اسوون في صالات بعد ما يعصرون روحهم عصار وفندق خمس نجوم للإكباريه اما المواطن الفقير صعب عليه الزواج في حالة المعاشات الضعيفة والكثير منهم عاطلين من غير عمل .

...، بذمتك من الحين يسوي عرس في السطح؟؟ هاذاك أول الله يسلمك لما كان فيه سطوح أصلا كبيرة وتتسع للناس، الحين من بيقبل أصلا من المعازيم يحضر عرس فوق السطح؟ الناس تغيرت مو مثل أول. وبعدين من يقدر على فندق خمس نجوم؟!!....

حمدالله

ملجة في مأتم. . وما سويت حفلة زواج بس راضية. ..
شريت زوجي.. وتركت الفشخرة. .وتفسفس البيزات

جدا رد رائع للزائر رقم 1

ساكن في شقة ..

واللي ما عنده سطح ؟؟
حسبي الله ونعم الوكيل

ﺑﺮﺯ ﺍﻟﺪﻭﺍء ﻗﺒﻞ ﺍﻟﻔﻠﻌﺔ

ﺧﻠﻨﺎ ﺍﻧﺤﺼﻞ ﺍﻟﻌﺮﻭﺱ ﻭﺑﻌﺪﻳﻦ ﻳﺤﻠﻬﺎ ﺭﺑﻚ

خله يجي المعرس اول عشان نفكر في الحفلة...شايفين شي؟

المقتصد

استأجر سياره كورلا اخر موديل وتكون فيها في الجو البارد خبركم جاي الصيف

حتي لو في مأتم

ألمهم أنا وخطيبتي مقتنعين وين بنحتفل حتا في مأتم أم سالم تقليل مصاريف خلو عنكم ألفخفخه مد رجلك على قد ألحافك ( جدحفصي)

ولد زويد

اااااااه على زمن الطيبيين حيث كان يقيم الأعراس على سطح البيت والزينة تعلو على المنزل والمسرح الخشبي البسيط للعروسين وأغاني الشعبية والأناشيد الدينية والحفلة الحلوة وزفت المعرس من المآتم إلى بيت العروس وكانت الناس سعيدة في هاي النوع من الأعراس إلى حد ما طلعت لينه موضة الصالات والفنادق وغيرها الحمدلله أن أقمت حفلتي في بيت زوجتي منذ 16 سنة ونحن سعداء ربي يدوم عشرتنه بالحب والسعادة والمودة

اعراس اول احلى

زائرة الوسط

من تواضع لله رفعه..انا سويته زواجي في البيت وحتى الصالون ما قلت ليهم عروس وكانت مصاريف الصالون 20 دينار...على الرغم من ان زوجي ميسور الحال ويقدر اسوويه في صالة فخمه ..والله رحنا شهر العسل عند الحسين هذا الفخر والزين...افضل من اعطي الفلوس صاحب الصالة الاجنبي ..اتصدق بالاف دينار الي واحد فقير ويكون الزواج مبارك افضل من هالحفلات الفاشلة صارت كأنها كازنو اجانب اعوذ بالله.

كثر الله من امثالش

وعساها عشره هنيه والله يرزقكم بالذريه الصالحه

عين العقل

ياريت كل البنات عقّل مفلج

ريم

ويش هتخلف ويش يعني صطح بيت..هي ليلة في العمر المفروض يستانسون فيها وتكون في ارقى المحلات ادا مو فندق تكون صالة راقية ما تقل خدماتها عن برستيح وعن نفسي اتم عانس ولا اتزوج في سطح ويشاركونا الفيران والقطط ونسمح نباح الكلاب خارج المنزل..وعن هلهرار وخلو البنات يستانسون هي بتكون ليلة عمر

من صدقش تبين تعنسين ولا تسوين حفلة فوق السطوح؟؟؟؟ مع أن هالظاهرة انقرضت لكنها كانت رائعة والبساطة والتواضع كذلك شئ جميل...وكما يفعل الأوربيون قلدوهم عالأقل في شي مفيد..

!!!

عنسي عجل هه

اذا سطح البيت فيه فيران وقطاوة يعني مستواش مو مستوى فندق وبرستيج لا تطلعين فيها و ظلي عانس و كل يوم ودي أكل فوق السطح للفيران والقطاوة اللي فوق بيتكم

إتقول ليلة في العمر !!

واللي بتتزوج أكفر من مرة ؟

ماما
أي برستيج تتكلمين عنه وانتي بنفسش تقولين بيتكم فيه فييران وصوب فريقكم جلاب؟!
مو طنازه ولا استنقاص منكم ، ولكن تكلمي بمنطق

ضدهم
قوووبش .
تفضلين العنوسة على زواج السطح ؟
بربقت اقول .الحقي على عمرش ودوري اليش ولد (هامور) اقصد ولد حلال .في هالبلد الحال من سيئ لاسوء.

محد

محد يسوي فوق السطح حتى الفقير، اذا كلش في صالة بيت أحد من العائلة او ماتم ، أصلا السطح كلش خطير مو ضمان أن البيت يتحمل ثقل المعازيم والحضور

مقترح فعلا العودة لحفلات الزفاف البسيطة والاقتصاد في التكاليف أفضل وأن تكون الحفلة في الفترة من الظهر للمغرب وقطع عادة الأعراس في الليل والسهر لساعات متأخرة حقيقة عندما نفكر في الموضوع سهر النساء لوقت متأخر وعودتهم كما أن العرسان يتأخرون والليل هو وقت الراحة والنوم... متى أصبح المساء أفضل وقت للحفلات؟؟؟؟ عن نفسي أتمنى أن تقام الحفلات في أوقات النهار وليس المساء وكفانا جنوناً سهر وتعب وصرف... في النهار أحلى ويكون وقت غداء أجمل لماذا نتقيد بشكليات كما فعل الآخرون نفعل؟؟؟

حسب المقدرة

كل حسب مقدرته ، أبو معاش ٢٥٠ أكيد بسوي الحفلة في فندق خمس نجوم والمليونير صاحب الأملاك ما بيتنازل عن الماتم

ولد العوضي

مليون مره احسن من الفسك والامفوشر مااحلئ التواضع

راحو الطيبين

السطح حر بس لو مكيف السطح عادي والماتم بعد زين بساطه الزواج من أحلى الأفراح

في الماتم

على وش زواج

والله خاطري اسوي لي حفله في صالة نيوسيزون عذاري
بس الواضح شكله في ماتم ...
الله يوفق ليناا ويتمم لينا على خير

فوق السطوح... تعرفون ان كلمات اغنية محبوبتى معزومه من ضمن المعازيم لاخوى محمد عبده اللى كتبتها كانت فى حفلة عرس فى بيت فوق السطوح .

افضل حفلة صغيرة في صالة البيت نعزم الصديقات و الاهل المقربين ....احلى و أريح

؟

انتو الي تحدد هل تريدون خسارة او تريد فائده
ليش اروح استأجر سيارة مبلغ مادري كم علشان يوم واحد وبعد اقعد لزينها ليش اسوي حفلة في فندق خمس نجوم وأقدر أسويها في قاعده سعر١٢٠٠ دينار ليش

الله

زمن اول جميل رغم الحر بس الناس كانت اتسوي فوق سطح البيت... اما حاليا فكل ما كان الصالة مع البوفيه يحسبون الناس فخامة... لو يرجع بي الزمن سويته فوق سطح البيت

والله ويش اقول ليكم يالوسط

سطح البيت لو يركبونه عشر انفار طاح وتهردم
اما صالة يبغي ليها راس مال اجمعه مدة ٢٠ سنه هي والمهر والطايح وبيزات الصوالين وغيره
اما فندق خمس نجوم قويه علينا يالوسط قويه لا تظربين على الجرح محنه اولاد الباليوس
خل الفنادق لهلها
الله يعرس كل عزوبي لو يفتر بعروسه في التفورتي فرتين فلاف حول البحرين مو لازم الكماليات اهم شي
الاخلاق

ههههههه

والله العظيم احلى رد ههههه

ضدهم
ويش خوك للبيع التفورتي ههههههه
بيع هالموتر ليي وخذ لك كورولا وافتر مع خطيبتك في المستقبل فيه فرتين فلاف وانا بكون وراك بالتفورتي ويش رايك

محرقي : المناسب في بيت المواطن الجديد عندهم الحديقة والسطح والصالة وكل شيء جديد في جديد بس هات معاك مترجم وعطر او بخور !

بمقدار ما املك

أخطط انا وخطيبتي أن نعمل حفل عرسنا في خيمة ابام التخييم في الصخير وراح تكن الدعوة عامة

في الفريق

احسن شي في الفريق. يحجزون الشارع بخلقة خضرا و مبروك للمعاريس

احمد

راحت ايام السطوح هههه

صباح الخير

أما انا قضيت تلك الليلة في أحد صالات التابعة إلى أحد المآتم وبسعر رمزي

ولاكن قبلها ذهبت إلى أكثر من صالة أفراح وكانت أسعارهم أقلها ألف دينار وهادة تبدير واسراف وأنا ميسور الحال

اي يالوسط

سطح المنزل !! الله يرحم ديك الايام البساطه والطيبه والقناعه

اني بنت لكن !

طبعاً مو في السطح لان الوضع تغير
لكن حسب ميزانيه الزوج
مو مهم الفخفخه
وشنو بقولون الناس عني اذا ما سويت في مرمريز
????
هذا وضعنا هالأيام

في الحوطة

في الحوطة

!!

عرس بخيل :)

حسب الانفاق

تكون الحفله حسب اتفاق الطرفين اذا كامت متوصعة او غقيرة تكون فى اى مكان

الصالة هي الخيار الأنسب، والحجم هو على اساس مد لحافك على قد فلوسك. البيت ما في مجال لأنه مو حجم القصور ولا هو ستور عند الحديقة، فيصلح للتواسي والملجة والحنة لما يكون عدد المعازيم قليل وعائلي. الفنادق عليها اشكالية وكثير منهم يركب كاميرات داخل الصالة ويقولون مبندين وأنا أشك في الشغلة وفيها مسئولية.

فى ماتم الحسين نحن حسينون

فى ماتم الحسين نحن حسينون

شالفايدة مأتم و النسوان مو محترمين المكان بالرقص و العقرة و الدي جي اغاني يازعم اسلامية ومالها خص بالاسلام مولية

صباح الخير

ايام زمان الناس مافي تذاكر وصالات وحجز
وعدم اصطحاب اطفال وبوفيه الان حجز ملابس زواج الف دينار وصاله ألفين دينار وسياره مزينه لكزس او مرسيدس وراتبه ٢٥٠ دينار وقسطه على ١٥سنه او اكثر

أفضل الأهازيج بذكر محمد وآل محمد في مأتم أنصار الحسين والاكل في سرداب المأتم وهو مكيف ومجهز وكراسي وطاولات والسلام عليكم .

.

افضل في صاله لانه الجو في البحرين مايساعد اني اسويه في السطح او في اي حديقه

في داعوس بيت الجيران

احسن شي في الداعوس

سطح المنزل... حسستني أن بيوتنا أكبر من بيوت العمانيين

ابوحسين

في المأتم

انا اقمت الخطوبة فوق منزل زوجتي وكان الكل سعيد بذلك
لماذا التبذير والنفخة الكذابة

عن نفسي

لو بكيفي سويته حتى سطح القمر او المريخ او عطارد بس للأسف ماقدر فهوا مره من العمر لن تتكرر وأحب الأشياء النادرة في ناس تسوي حفل زواجهم في جزر اوربيه الله كريم .
لا يطلع لي واحد ويقولي يالله خذ كيفي وهذي حريت تعبيري

العرس

حتى لو على ساحل البحر

الرجال كلهم .. المرة اللي تحاسب لهم وتجمع فلوسهم وتتدخر وتقول ما بتكلف عليهم ياخذون اللي ادخرته بعد سنين ويطبقون الشرع حلل أربع ولا يسافر ويتمتع ويا شباب القهاوي والديرة المحترمين. اللي يبي بنات ناس يتحمل

يلا خذ

واجد تتحلم الاخو، سو اللي بتسويه عسى في جزر هاواي الاهم عندك تنق لو بس تتحلم عفر يلا وشعاد الكلام بلوشي وعلى قولتك حرية تعبير كيفك ????

سذاجة والنتيجة وحدة

تصرفون عشرات الآلاف في ليلة وحدة وتالي تدفعونها ديون لعشرات السنوات
والنتيجة هي نفسها
زوجة وحياة وعشرة عمر
الله يخلف على مثل العقول

صراحة

أصبح الوضع خارج عن حده الطبيعي و المعقول .. الناس لانهاتحاسب إلى نظرة المجتمع لها و ليس الله سبحانه و تعالى و هذا ساعد الجشع في محلات تأجير الفساتين و صالونات التجميل و صالات الأفراح و غيرهم من التمادي ..
ليش ما البس فستان جميل بسعر معقول
ليش ما اسوي شعري و مكياج بسعر معقول
ليش ما اسوي خطوبتي في منزلي أو مأتم
ليش ارهق الرجل بمهر مرتفع ..و انا اعلم ان بركة المرأة بقلة مهرها
ليش التبذير عشان لمفوشر و التبذير و إرهاق الرجل سنوات في دفع القروض و الديون