الكل يعرف الصورة إلى الجابري و تم القضاء عليها ولكن الزمن يعيده بسبب سوء المعاملة من المشرفين و سبب عدم السماح لطلبة بالخروج من الباب لشراء الاكل من الخارج و مثل ما الكل يعرف محد ياكل اكل منتهي سنة 2008 المدير سمح لطلبه بالخروج من الباب لشراء الكل وما صارت مشاكل و لكل كان يحترم الوقت ولكل يرجع قبل انتهاء وقت الفسحة

خلو الناس تعيش.. ..

ينتظره مستقبل زاهر .. 90% من هؤلاء الطلاب مصيرهم الفشل.

من المدرسة الغلط اكل الكفتيرا زبالة اهربون يشترون من برة وجون لانة اكل المدرسة موزين فيطرون يسون هل تصرف يعني الغلط من المدرسة وادل المشرف نذل بعد اكيد الطالب بسوي اشياء جدي عشان يفتك اشوي من المشرف ومن المدرسة فل غلط اصير اكثر الاحيان من المدرسة

الهروب خخخخ
من طيب الاكل الي في الكافتيريا الواسطات تلعب دورها في متعهدين الكفتريات الي في المدارس الطالب اذا بيهرب من المدرسه فهو معذور لا معامله عدله من المدرسين و لا تدريس عدل المدرس يبي يأخذ الراتب و خلاص عساه محد نجح من المدرسه يعني بالمختصر لا تعليم عدل ولا اكل عدل أكيد بينزل مستوي الطلاب في البحرين من الساعه ٧ الي الساعه ٢ يعني إرهاق الطالب بمعني الكلمة وزاره التربيه لازم تتعلم من مدارس أوربا ٦ ساعات دوام الطالب لأكن التعليم متطور لانه بالاداء مو بالواسطة

يوم الحرية

اللي عندكم مو حضاري عند الولد يوم الحرية
أغلب الأولاد ما يطيقون الحبسة والهدرة وعليه زيادة مقصف المدرسة
شوفوهم لين دخلوا الجامعة يصيرون عاقلين ولا محاضرة تفوتهم
يعني بدل تمديد الدوام سولوا لهم توقيت مناسب مثل الجامعة يسمح لهم بالدخلة والطلعة وعدلوا المقصف سووا كفتيريا دخيل الله وجيبوا وجبات عدلة

.

احلى ايام كانت ايام الهروب والاجيال قاعده تواصل الهروب للحين!!

طول سنوات الثانوي كنت أهرب في الفسحة علشان أكل برة وأرجع قبل الحصة لان أكل المقصف زبالة وصادني حساسية من الطعمية المعفنة وتسمم من الشاورما البايتة... والحمد لله كملت دراستي الجامعية وفي وضع أحسن من المحسوبين شطار في نظر المدرسين والوزارة...
أعتقد سبب تردي أوضاع اللي ما يشردون هو تاثير أكل المقصف على عقولهم... ههههههه
الرسالة للطلاب... أهربو لمستقبل أفضل...

هذا الايام الحلوة صراحه, أيام اول ما كانت فيه مساوير رفيعة شذي, بس ويه شوي مساعدة او تسلق فردي نقدر نشيل عليها. وحتى الحين ويه هالقفص اللي الطلاب فيه للحين يقدرون يطلعون. مهما حاولتون ما تقدرون على المراهق اللي يبه يسوي اللي في باله

مرة هربت انا وصديقي واحنا في الشارع وقف لنا مدير المدرسة ورجعنا الصف مرة ثانية الله يسامحه

ما احلى ايام مدرسة الخميس كانت بدون اسوار وكان فيها القهاوي والحياة والتعليم فيها عجيب الله على ايام زمان ايام الابتدائي

كفو عليه والله ، شنو بحصل من مدرسة صناعي؟! خله يطلع يجوف له درب ثاني صح بدل هالمدرسة ...الي ليومك هذا متعذبين لأن سجلنا فيها.

الطلاب اغلبهم يشردون حق يروحون ياخذون لهم ريوق و يرجعون المدرسه ، لو كانت الوزاره توفى كفتيريا او براده في المدرسة انجان حتى هروب ما بتحصلون في المدارس !

اكل المقصف غير صالح للاكل الادمي و المدرسين كل واحد نفسيه اكيد الطالب راح يحس روحه بسجن ..وبصراحه الي مايشرد ايام الثنوي ماعاش حياته ..تعودنا نشرد كل يوم ايام الثنوي ..راحت الايام ااحلوه

انا كنت طالب متفوق لكن أهرب بين فترة وفترة بسبب شعوري بالملل داخل المدرسة.

بداية الفشل في الحياة

بداية طريق الفشل انصح الطلاب الالتزام بمقاعد الدراسة من مجرب كنت أعمل هذا الشيء في السابق والنتيجة الفشل وضياع الفرصة في الحياه

بوووه وصلنه 2016 وللحين فيه طلاب تشقح السور !!!! انه عبالي هالحركات قديمة لكن طلعت متأصلة وكل جيل يورثها للجيل اللي بعده هههههههه

سويناها في الثانوي

بس كنه قروب ملتزمين بالتحصيل وايام الي نحس ما عدنا شي نهرب
الغريب اني كنت اتسور للدخول لانه المشرف يطردني لما اتاخر
ومرة صادني جيب الشرطة ودخلوني المدرسة بحماية الداخلية

..

قضية الهروب من المدرسة أصبحت من النادرة التي يعملها البحريني الأصيل .

ليش خاشين اسم المدرسه.

..

لأنه الوزارةة بتسوي سالفةة للمدرسةة وللطالب ، ويقدرون يفصلون الطالب فصل نهائي او يحولونه منازل ع هادي الهربةة ، خصوصاً انه شاقح السور مو طالع من البوابةة

المدرسة المفروض تكون بيتنا الثاني الجميل الي مزروع فيه الورد الي المدرسات مثل الامهات حنونات وفيه أنشطه ترفيهية وتنوع ف أساليب التدريس ف الهواء الطلق مو محصورين بين جدران وحديد السور , بصراحة الله يساعد الطلبة من الحصار . والمشكلة ان الوزارة ماتبا أنتقاد .

المقصف

اقتراحي للمدارس ان تكون الابواب مفتوحة كالمعاهد والجامعات والنظام بتسجيل الحضور. كي لا يحس الطالب بانه في سجن

تصميم المدارس يوحي فعلا انك في سجن اسوار رفيعه مرفوقه بسياج حديدي كل شي ممنوع ومحاسب عليه ولك وقت معين حق الاكل وخمس دقايق حق روحه الحمام انصح وزاره التربيه تجيب ليها خبير يفهم عقليه الشاب المراهق ويصمم مبنى يناسب تفكيره ويخليه يحب المدرسه بدل ما يشرد منها

جملة تطبق في اغلب المواضيع:-
اوجد البدائل حتى يطاع نهيك
واوجد الترغيب حتى يطاع امرك.
للاسف البعض فقط يعرف الأمر والترهيب ولا يعرف البديل ولا الترغيب.
حببوهم للدراسة بإيجاد اجواء مناسبة لذلك وبعدى حتى لو تركتم الابواب مفتوحة وبدون حارس لن يترك المدرسه احد. بسبب الاجواء الغير مناسبة نرى ان البنات يهربن ويدافعن عن ذلك.

اي

آمبين الدراسه مملهوالدليل كتابتك املاءك غلط واضح اصلا

ااااااا

تخلف

الخلل ليس في الطالب

بعض المدارس الطالب يكون فيها في سجن بل السجن أرحم له ، الطالب يود من يتقرب منه و يعيش هموم الطالب و يعامل الطالب باحترام إلا أن الأعم الأغلب يقوم بهضم الطالب بالصراخ عليه و منعه من أبسط الأشياء و تقييد حرياته و إحراجه أمام الطلبة ف لا يكون من الطالب إلا الهروب من هذا السجن المظلم ، أما عن الهروب في نفسه أری أنه لا يسبب ضرر فالطالب الحريص علی دراسته يعرف متی يتواجد و متی يهرب و لله الحمد كنت أهرب و أنا من المتفوقين و لم يعق الهروب تفوقي لأني أعلم بمصلحتي من غيري .

والله لو اني مو بنت شردت .. الوضع لا يطاق في المدارس سجن ابو غريب مو مدرسة. المعلمات صريخ وكلمات نابية و تعليم فاشل نضطر نروح معهد عشان مانرسب. اكل وصخ مال المقصف ياما حصلنا لصقة داخل السندويج. يذبحونا في الشمس في الفسحة و ان رحنا في الممرات نبي نتظلل قالوا ممنوع. ممنوع نقعد في الصف في الفسحة. حمامات عزكم الله قرف وماتتنظف الي يدخل يمرض. معلمات المواد الثانية تاخذ الرياضة والرسم اذا بنحصل مجال نرفه عن نفسنا خذوه وسووه حصة ريض او فيز .. ليش مانشرد يعني .. محد يشرد لان يبي يشرد

يطلعون يشترون لهم ريوق

احلى ايام الصراحة.. و الي احلا منها لما ترجع البيت و الوالد ينتضرك..... حق المقسوم يعني20:)

ولا مرة في عمري فكرت اهرب من المدرسة

عندما يتم تحسين ظروف مرفقات المدارس عندها نتكلم عن الهروب ، تشبيهي لحال الطلبه اثناء الفسحه بالقطط التي تبحث عن ظل
المقصف المدرسي يجب الغاءه واحلال مطعم متكامل فيه من الطاولات
الباب يجب ان يكون مفتوح والكل يتحمل المسئوليه
ثقافه المحافظه على مرافق المدرسه يجب ان تنشر فدورات المياه الله يعلم بحالها من التخريب

وضع معين يجب التفكير في اسبابة وايجاد حلول للحيلوله دون وقوعه

كيف نرغل الطالب في المدرسة ؟؟
كيف نطمن الطالب على مستقبله ؟؟
كيف نجعل الطالب يحب المدرسة ؟؟
كيف نقنعه انه عندما ينال الشهادة سيتوظف مدرس ولن تجلب الدوله المدرسين من كل اصقاع الارض وتخليه يراقع لطوف ولو كان متفوق ومتخرج بامتياز؟؟
كيف نقنعه بان موظفين .... هم بحرينيون وليسوا اجانب ولو كانت لغتهم اوردو وسيحصل على وظيفه مرموقه معهم ....؟؟

ننطر رد وزير التربيه ... ____________

القصيده القديمه الي يعرفه بلحنها
اذا شعرت بالملل اذا شعرت بالملل اهرب مدرسه اهرب من المدرسه
اذا رائك المدير افلت عليه هندسه افلت عليه هندسه
و الباقي نسيته صايدني هاليومين زهايمر شوي
راحت ايام الهروب من المدرسه و ركيض الدولاب ننخش للهده

المشهد غير حضاري انه الانسان ينحبس في المدرسة وبعدين ينحبس في الشغل...هذه الي مو حضاري

صدقت يا خوي يفكرون الطالب آلة للاستقبال بلا مشاعر ،هذا دليل على سوء تفهم حال الطالب وعدم توفير السبل والمرافق الملائمة من مأكل ومكان مناسب للدراسة ،والحديث يطول.

هذا ليس هروبا. بل تسلقا. تمرين علي التسلق للمستقبل. جميع الخائبين الذين لم يتمرنوا علي التسلق و جثموا في صفوف الدراسة للعلم خائبون. المتسلقون هم من يحصلون علي المراكز و المال و الشهرة و الاقتدار. اعملوا احصائية و قارنوا أهمية، قدرة و مال الدارسين بغير الدارسين حتي تكذبوا رأيي.

الله على أيام الشردات ، أحلى ذكريات

قلعة

حشى قلعة مو مدرسة لابد من إيجاد ظروف تحبب الطلاب في المدارس الموجود حاليا ينفر ولذا تصل بالبعض الى الهروب

قلعة

حشى قلة مو مدرسة

انا صراحة كنت اهرب من المدرسة، لانه المدرسة كانت في اغلب الوقات مملة و على قلة الفايدة. و الهروب اغلب الاحيان وقت الفسحة نروح ناكل و نرجع. في المدرسة كنت احضر و احس كأني في سجن، لا في انشطه لا في ترفيه كله مواد مامنها فايدة. و الجدير بالذكر اني كنت في مدرسة خاصة و نقلت الى الحكومة في الثنوي و الفرق كان جداً واسع من ناحية جودة التعليم و الاهتمام بالطالب و الانشطة و الترفية.

نعم المشهد غير حضاري لأن :

المدارس عندكم غير حضاريه ، المفروض أبواب المدارس تكون مفتوحه وإن أراد الطالب يتعلم ويدرس فأهلا وسهلا وإن لم يرد فالباب يفوت جمل ، باستطاعة إدارة المدرسه أن تتخذ إجراء ضد الطالب الذي لا يريد أن يتعلم ويدرس ، لكن غلق أبواب المدرسه خطأ.

هربت مرة

اعتقد انه وزاره التربيه و اداره المدرسه هم السبب ليش مايخلي الباب مفتوح و الي يحب يتعلم حياه والي مايبي يتعلم يطلع من الباب و الباب يوسع جمل و التعليم مو اجباري و خساير الوزاره عليهم مامنها فايده . انا هربت بس مو مقتنع بسالفه الهروب على رغم اني ماحب اغيب حق لايفوتني شي لانه مابحصل لي احد يشرح لي و الابوين هم الي لازم يعلمون اولادهم الاحساس بالمسؤليه. و الي مابيحس ولابيطيع بكره الزمن و الدنيا بعلمونه شلون صعوبه الحياه .
والله يهدينا ويهدي الجميع
وبالتوفيق لكل الطلبه واحترامي ليهم

ذكرتني بالايام اللتي مضت من الزمن الجميل

عادة قديمة جديدة

هربت ؛ بس الباب مفتوح

السبب الرئيسي هو التمرد والميل للإستقلال

اتوقعه مو هارب

طالع يشتري ليه ولربعه ريوق وبيرجع والله يهدي طلبتنا واولادنا ويحبب ليهم العلم

الهروب من المدرسة امر فطري

وزارة التربية والتعليم و ادارات المدارس هم سبب هروب الطلبة فإن اغلب الطلبة يهربون من المدرسة لشراء فطوره اليومي .. ولماذا لا يشتريه من المقصف المدرسي ؟ بالتأكيد بسبب ارتفاع اسعاره وسوء المعاملة و قلة النظافة للاغذية .. لذا لو لم تحل وزارة التربية مشكلة المقاصف فلن تستطيع ردع الطلبة عن الهروب ..

اعربي

ما ينراد تفسير، النظام التربوي مو قادر احتواء هذا الجيل

خله يطلع ويتسانس ،،،،

yes yes I used to runaway from the wall ..
ali hasan says a7la mash7d

عندي الحل

1لاهتمام بأكل المقصف ومراقبة النظافه وتنوع الاطعمه
2تنوع الحصص في اليوم بحيث يتخللها حصص عمليه مثل الزراعه او الفن او التقانه او الرياضه او الخزف او الخط او النجاره وبشرط ان يدرس الطالب هذه الحصص لكي يحس بحلاوتها والاستمتاع بها
3ان تغير اساليب التدريس من حشو معلومات الى مهاره في الماده وابداع
4تقليل وقت الدوام المدرسي
الابتدائي من 7الى 1
الاعدادي من 7الى 1و30
الثانوي من 7 الى 2
5تفتح الابواب ويجعل الامر عادي جدا اذا راى الطالب كل هذه المغريات اواكد لكم انه لن يخرج من المدرسه

نعم هربت

كنت بالابتدائي والاعدادي حدي اخاف اهرب
بالثانوي هربت واجد نعم وسعيد بذلك بعد سنوات طويلة من التخرج، كنت احياناً من الباب اذا مفتوح واحياناً من السور بسبب ان المادة تافهة ما فيها محتوى والدرس ممل فنهرب جماعياً بين فترة واخرى،، ولا نهرب اذا المادة ممتعة او الحضور ضروري او مدرس المادة يخلق جو ايجابي في الحصة،،، الزبدة ان للهروب اسباب احياناً
م.و