الوسط .. كتبوا عن موضوع الا يبون يخطبون لولدهم ويطقون باب 12 بيت يتمنظرون في بنات الناس من غير جدية
وعقب يقولون مافي نصيب من رغم إن البنية ما يعيبها شي ولا يسألون عنها أساسا
جنهم زايرين معرض سيارات يدور الاحسن فالاحسن
والسبب في هدي الضاهرة غالبا الأمهات يازعم ولدي تعبت عليه ربيته درسته ماعطيه أي احد!! وفي الأخير ولدها تمر عليه السنين ويصير غرشة اجار ززززز مبروك عليش ولدش المزهرية ((ترة بنات الناس بعد اهلهم تاعبين عليهم!!

البعض اصيرووون اخوات والبعض حدث ولاحرج اجيكم الثانيه وقاحه وحقاره وسالكه طريق الطبوب والمشعوذيين

جدي

جدي الله يشافيه ويطول عمره متزوج 4 وحدات..بس في البداية والي جاب منهم ولاد ثنتين..وكان كل وحدة في بيت والبيتين جنب بعض ما عمري شفت بينهم مشاكل او شي بالعكس..بس بعد تواصلهم كان خفيف يعني كافين خيرهم شرهم عن بعض..في المقابل جدي الثاني متزوج هندية على جدتي الله يرحمها قلبها اسود واحقر منها مافي بس جدتي طيبة مسكينة من جذي عاشو في بيت ويا بعض..عن نفسي افضل الانفصال لو زوجي فكر يتزوج غيري..لاني ماقدر اتحمل هالفكرة ورحم الله امرأ عرف قدر نفسه

بنت عليوي

ما بروح بعيد، أمي ومرت ابوي، كانوا دائما مع بعض حتى السوق يروحون مع بعض وعايشين ببيت واحد الله يرحمهم

انا ما يبط جبدي

اللي يقول بيزوج الثانيه انتو بروحكم حافين منتفين حرام تاخذون بنات الناس وتعذبونهم فكر في تطوير نفسك وآمن مستقبل عيالك بعدين فكر يا تصيب يا تخيب مالت بس

ههههه

صح بيت واحد حافي منتف مايقدر يصرف ع بيت بس الرجال مجنون خصوصاً للمرءاه

الضرات

اني امي زوجة ثانية للوالد طبعا الزوجة الاولى توفت الله يرحمها ويغفر لها بس ما كان في اي عداوة بين الوالدة وبينها طبعا زمان اول في ضرات عايشين بسلام بس الحين ما اعتقد في واذا في فاعتقد حالات نادرة

يلا خد

اذا فلسطين اتفاقيات السلام لاتنفع ولاتدوم فيها بيدون سلام بين ضرتين ؟

جيل اول

مايعدلون حتى ماديا تجوف الزوج يسجل بيت واملاك لزوجة والثانية نصيبها اقل مايتقارن الحين هذا هو العدل اللي الله امركم فيه في التعدد ؟

نفسيا

لازم الشخص بيميل قلبيا لوحدة اكثر وهذا مذكور في القران ان مابقدر الواحد يعدل قلبيا واذا اني بعطي كل قلبي لزوجي بضايق عدلل اذا جفته يشارك نفس المساعر ويا وحدة ثانية جنه يلعب عليي مو كل مباح يناسب الجميع فعلا التعدد حل لواجد مشاكل وقضايا والله له حكمته بس احس روحي مابستحمل حتى لو حاولت

شفيكم

حتى مشاعرنا الطبيعية مانقدر نعبر عنها ؟ الضرة نكرها كيفنا مشاعرنا تعالوا حبوا الضرة وغيروا مشاعركم تجاها ؟ شنو هالمنطق لو مشاعر الكره هذي بتتغير جان تغيرت من زمان حتى زوجة النبي غارت من زوجته الثانية مو بعد احنا والله تعالي بتزوج عليش واستانسي وحبي ضرتش ؟ خخخخ

خدعه

سويت علاقه مع شخص وبعد سنه اكتشفت انه متزوج ، وشنيت عليه حرب لانه خدعني ويوم تركته ذبح روحه عشان ياخذني الثانيه بس ما وافقت عليه لانه من خلال كلامه الاخير انه زوجته مافيها عيوب غير انها ماتعطيه حقه على طول
وانا حتى لو في مشكله بينهم مستحيل اقبل اكون الثانيه

شنو هالهرار بعد

درينا ان الشرع حلل اربع ولا اعتراض على حكمة الله لكن ان نحب الضرة ونفتح ونرحب فيها بالاحضان ؟؟ !! مو مطالبين ولامجبورين ولامن حق احد علينا ان نحبها جوفوا اذا الزوج مستمل انصح ان يخليهم يلتقون ويقعد يشتري نفيش ويقعد يستمتع بالمصارعة ههههه

ضرة ؟

عشان لين اجوفها اقتلها وانتفها وخل هالزوج اللي يباها يداويها هذا اللي ناقص بعد ماحتاج زوج يتزوج عللي لان وش محتاجين من الزواج هالايام ؟ مصرف ؟ حياة كريمة ؟ حقوق ؟ الحمد لله اهلنا مكفين الله يطول في عمرهم ويخليهم الزوج فايدته هالايام ان هذي سنة الحياة الطبيعية والطريقة الصحيحة الوحيدة لانجاب الذرية ..ممكن في زوجات تظل ويا متزوج عليها وتعامله احسن من قبل لكن الحقد مدفون في القلب بتصير حركاتها وياك كله نفاق

اغلب بنات هالجيل

مايستحملون الفكرة مو بعد ضرة ههههه الا اذا ماتفتكر واجد زوجها قعد وياها او لا وهمها فلوسه منه وبس عشان تصير ام اي ممكن شخصيا اذا تزوج عليي اذا ماعندي عيال منه بطلق واذا ماقدرت بقعد وياه على مضض وبحقد عليه شلون يحطني بالهموقف ولايجي يبي شي مني عنده ثانية تكفي وتوفي مو عاجبنه يطلق

خلكم واقعيين شوي

ممكن يصير ان زوج عنده ثنتين وكل وحدة في سكن مستقل ومايجوفون بعض فمالهم دخل في بعض لكن عيال كل وحدة بيصيرون جنهم مو من نفس الابو يعني مايبون يجوفون بعض ولين جافوا بعض رسميات ولاجنهم خوان الصراحة الضرة مضرة فعلا يعني معروف ان في الجنة مافي غيره لكن احنا في الدنيا الغيرة واصلة للسما وهذا شي داخلي مانقدر نتكحم فيه يعني غصبا عنه

الصراحة

هذا الموضوع جدا حلو يعني اقدر اتزوج وحده ثانية بدون مشاكل

جرب وجوف

بس لاتلوم الوسط عقب

هههههه

اتزوج وشوف ياربي تاخذ وخده توديك نستشفى المجانين

تزوجت اثنتين

لحُسنِ حظي تزوجت اثنتين
وما أدراك ما زواج الاثنتين
يعيش المرء منعماً في كل يومٍ
يُكرم بين ذراعي أروع زوجتين
له سكن يسود الدفء فيه
ويملؤه حبٌ ووفاء الدُرتين
رضا هذه يثير شعور هذِهِ
فتمنحه رضاها ضعفين
لهذه ليلةٌ ولتلك ليلةٌ أخرى
حبٌ دائمٌ يلقاه في الليلتين
يبادرون إمتثال القولِ منه
فيلقى ما تمنى مرتين
أرى المغبون من يحيى لزوجٍ
تناطح بعلها عيناً بعين
بادر يا أخي بالزواج أخرى
فتلك لعمري احدى الحُسنيين

اتسند وبلا نصايح

ندري عندك وحده مطلعه روحك وجاي تكتب حجي مو بالواقع....لكن نصيحة مني اتسند ولا تكتب شخابيط منت قدها

لابد من اتفاقيات السلام ،،

لازم يسوون اتفاقيات سلام عشان يعيشون متهنيين،، يعني لي متى بيتمون يتهاوشون،، انا أتذكر صديقتي تقول لي ان امي ما تتغدى ولا تتعشى الا مع ضرتها ويطلعون مع بعض وسمن ع عسل،،
وفي العكس الا تضاربو وتنتفو لحد ما الزوج طلق الثانيه عشان يقدر يعيش بهدوء خخخخخ

هل الرجال يضعون نفسهم في مكان المرأة ؟!

لو الشرع حلل للزوجة الزواج بأكثر من رجل تقدر تتخيل زوجتك مع واحد ثاني و صاكين على نفسهم باب الغرفة ؟ او تشوفها عايشه وياه كعروس جديدة و مسافره معاه شهر العسل و انته منثبر في البيت ،، و بعد ممكن بعدين ما يكون في عدل هذا بالضبط شعور المرأة
و اقول لو الرجل يحب زوجته مستحيل يتزوج عليها لان أكثر شي ممكن يجرح المرأة و يكسر خاطرها ان زوجها يكون مع امرأة أخرى

في عيلتنا فيه

والبنات مع مرت ابوهم يخذمونهم بعيونهم ... بس اشفايدة الزوج معيش الأولية ف بيت والثانية ف بيت و سنين من فهمنا هو مع الثانية وأهم شي عيالها
مو مهم الفلوس أهم شي العدل ...
الحين يوم طاح هي تسافر ع راحتها

زمان أول تحول

الزمن الجميل كان مختلفا من كل النواحي اما هالزمن فالضره تكون مضره في المجتمع المتدني فيه الأجور فالزوجة الثانية أصبحت كالحلم على معظم الرجال

الصابره

صباح الخير عليكم.لو الزوج يوفر كل شيء عادي يتزوج أهم شيء ارتاح منه وجوده وعدم وجوده واحد يقول المثل ...لي اخذته القرعة تأخذه أم الشعور

ضحكتيني يا الصابره

ليش تبين زوجش يتزوج عليش اكيد فيش خلل ...

بالعكس

احس بالعكس مدام تبي الفكه منه احتمال اهو اللي عندة مشاكل
لان فعلا فيه رجال خروجهم من البيت هالجم ساعه نعمه
اعرف صديقة زوجها عصبي وكله صراخ على ادناة الدون عليها وعلى الجهال و ادائه في الفراش معدوم ، يعني فوق شينه قواة عينه

وليش

فيها خلل الخلل منه اذا ما يصرف عليها وهاملها شنو تبي منه فرقاه عيد

قليل جداً

اعتقد فيه بس نسوان مال قبل مو هالجيل .. امي اهي الزوجة الثانيه حق ابويي الله يرحمه وكانت تعامل مرت ابويي الاولى احسن معامله وتطبخ ليها ولاولادها اللي هم اخواني الكبار الغير اشقاء .. وهذيك كانت ساعات زينه وساعات لا .. تقول امي ان مهما كان لازم داخلنا غيره لو شوي !

بالنسبة ليي لا

اي وحدة قريبة كلش من الاهل جذي مع ضرتها والحين اكثر من 30 سنة مع بعض
وعايشين بيت واحد وماشاء الله الاخوة والاخوات نفس الشي ماعندهم فرق
وكل شي تمام الحمدلله
بس اني اكيد ما ارضى ولا اقدر اصلا

.....

البعض في التعليات دمروا قصص ناجحه مع الضرات
يعني في مجال لنحاح ادا شلتون الاناتيه

من قال لك

ان هالنسوان اللي رضوا بالضرة شالوا الانانية ؟ كل اللي يتطلبه الموضوع واحد يتزوج على مرته والضرة توافق وممكن تبلع العافية الزوجة الاولى وماتعترض هذا مو معناته عاجبنها لكن بالنسبة ليهم احسن من تطلق وتخرب بيتها فيخشون الغيرة والغصة خصوصا الزوجة الاولى مسكينة الله ياجرهم دنيا واخرة على الصبر والقهر

أكيد

بس يعتمد ع الزوج اذا كان رجال يتحكم في مشاعره ويعدل بينهم عنده قوه مو ضعف شخصيه ساعتها يخليهم خوات وأكثر وفي ترا في هالزمن وشفت انا بنفسي بس أهم شى تقدر تصرف عليهم مو تجوعهم

الى الروسيات

لتقليل العنوسة المفروض الكل يتزوج زوجتين هالزمن
والمفروض يتعاملون مع بعض على انهم خوات قدر الامكان
اذا تزوجش مو معناته ملكتينه يالروسية
خليه يستانس :)
م.و

يا ابو الروسية

بذال ما تتزوج ثانية تبرع بالمهر وزوج العزوبية احسن

روووح

بروحه الشباب العازبين مو قادرين يتزوجون العازب أولى بعازبة مثله تبي تتزوج على مرتك خذ مطلقة او ارملة وسو خير

....

في عائله صديق عمي بالسعوديه مزوج 4 كل وحده بطابق ووقت الاكل كلهم يتجمعون باولادهم على سفره وحده وبدون مشاكل .
المغزى المراه لازم ماتكون انانيه مثل ماتبي تزوج لازم تقبل لغيرها بالزواج وعدد النساء في البحرين اكثر من الرجال .. عناد بلا داعي ادا رجلش ناوي يتزوج اخطبي ليه

لا صدق

عاد ماتبين إلا رجالنا من يشوفون الجديدة نسوووا كل شي ...

انت قلت بنفسك السعودية

اصلا في السعودية ممنوع على النساء ابسط الحقوق العادية الا هي السياقة فمو غريب ابدا اللي قلته لكن صدق في ناس ماتخجل على روحها تبي مرتك تخطب ليك سبب خراب بيتها وقهرها ؟ وسبب حقدها على زوجها؟ الاغلبية الساحقة من النساء ماتبى حتى تلاقي وجه هالضرة اي والله خطبي له اخطب لروحك عشان ابسط لك اللي انت قاعد تقوله .. يامعلق جيب فيروس مضر وحطه في جسمك بلا عناد يلابدون انانية وعلى فكرة البحرين مو لهدرجة ازيد البنات اصلا مايكفي كل الرجال يتزوجون ثنيتن والعازبين اولى الصراحة بالبكر

اي عاد

السعوديه غير قادر يصرف عليهم مو اهنيه يأخذ الثانيه بعدين يصيح ما عنده فلووس

السبب الرجل

إذا كان الرجل عادل ما بيتهاوشون
ولكن إذا فضل وحدة على الثانية لازم بصير هواش
وبعد إذا كانوا ثنتينهم زينين يصير أحسن وأحسن

الضره مره

مختصر الكلام ومثل اخوانا السوريين الضره مره مهما كانت

ولو

الحين زمنا قليل الا عنده زوجتين لانه الميزانبه ضعيفة ويادوب يغطي مصرف واحد والله يهدي الجميع

بس لو يجرا هالاسباني يجيب ضرة

لنتف اذونة واحلقة صلعة خضرة واسوي جسمة شنيتر من العض والتفليص واحرمة من راتبة وريوقة بخصمة بلاشاي وغداه سفط بلاسمج وعشاه جبن بلاخبز اي نعم

هههههه

كنت متألقة بس بجد ضحكتيني
يقطع ابليسش
هو عندهم بس وحدة وما ينصفونا بعد مو يأخذون غير

ونقول

خلاص انتهت الانوثه من العالم ،، جربتين تسوين لقطات اتدرتيكر لو بعدش ؟؟ اذا جربتين روحي للقطات بروك ليسنر

شيء طبيعي

في البداية واجد صعبه على الزوجه الاولى ولكن بعد سنوات تتقبل ويصير الوضع عادي وخصوصاً اذا الرجال عادل ويخاف الله في زوجاته ، واجد نعرف نسوان رجل متحابين وعلى قلب واحد ، ولكن بعد ما أأيد الزواج الثاني في حال إستقرار الاسرة وعدم وجود حاجه الى التعدد ، الزوجة اذا شبعت حنان ودلال من الزوج تخلي زوجها أسعد إنسان

كلن له رايه

يصير عادي عندك تجوفها ساكتة خلاص بعلت تبن مع ان مو عجبها اللي صادها الانسان ساعات يتقبل اشياء ماتعجبه لكن يصبر مو معناته خلاص سكن الجرح او الوجع يلا الله كريم

على شخصية الزوج

اذا كان شخصيه متزنه وهادئه وعادل مع زوجاته وما يفرق عادي ولكن بعد في مايرضون ان الزوج ينزوج وما يؤيدون على اطباع الاشخاص

رغد

الضرة تحر لو هي بالقبر
ومستحيل مرة تقبل من داخلها ان وحدة ثانية تشاركها في زوجها
ولو هي صارت مغلوبة على امرها.. خل الزوج يجرب ياخذ الثالثة بيشوف ان الثانية تثور وماتقبل مع انها بالاساس ضرة
والضرة مضرة
والظاهر اليي تشوفونه لا يعكس واقع الامور ومرها

أبو الضرات

يالله تصير عندي ضرات ويعيشون بسلام ووئام حق تقل العنوسه

راونا مراجلك

ههههههه لااجي تكتب قول فعل نبي والله يسمع منك وتاخد اربع يشيبون راسك وودونك مستشفى الإعصاب وتنام ع مهدأاات وتنف شعر راسك وتضربه بالطووووف

هههههه

اللي يبغي يقلل العنوسة ليش ما يتكفل بزواج أعزب و بهذي الطريقة يزوج شخصين رجل و امرأة بلد ما هو بنفسه اللي اصلا متزوج يقوم بالزواج من امرأة 2؟

ودي اسأل

ما هي دوافع الهواش ؟ وليش الغيرة؟ لعلها على صكة الباب

قصدك ابو الافلاس

منتفين ماعندهم سكن للأولى يبون الثانية من المجنونة تعيش وياضرتها ؟

ما اااااا في انصاف

اكيد ما في وئام
أغلب الضرات مشاكل واللي زيين مع بعض ينعدون بالاصابع

نعم شفنا

نعم
في البداية تصير حروب شرسة بس بعدين يهدأون خصوصاااااااا إذا كانتا تسكنان في سكن مستقل )لأن المرأة تحب تكون لها مملكتنا الخاصة حتى إذا كانت علاقتها ممتازة مع الطرف الآخر ) بالإضافة إلى عدل الزوج

القلب يأن

حتى لو اخبروك بانهم على وآم فالقلب يأن من الداخل ، وصراعات وغيره داخل المنزل

بنات احين

من وحده فكر زوجها بتزوج قالت طلقني طلقني

شي طبيعي يالاخو

اقلب نفسك حرمه عقب بتحس
او اتخيل لو ان الاسلام شرع للزوجة الزواج ب 2 او 3 رجال
هل تقبل ؟

عجبه

أمر طيب
أهم شي ماكلهم
يشربهم
لو يشتغلون ويصرفون على روحهم
بس شكلهم مال اول

نصيحه

انا اقول يتهاوشون عليك و لا يتهاوشون معك .. نصبحة للي متزوج اثنتين و اكثر لا تحاول الاصلاح بينهم لانهم سيتأمرون عليك ...

عجيتني افكارك .. عطني زيادة

خلني اتزوج الثنتين مرة وحدة
شكلة هالمرة القرض بيكفي حق ثنتين ههههههههه
بعد شنسوي 30 سنة مو قادر اتزوج
واخرتها اخد الثانية قبل الاولى
اهم شي يتهاوشون عليي

ابو قاسم

رحمش الله يا امي عايشة ويه خالاتي نسوان ابويي وما بينهم اي مشكله لان شخصية ابوي ما تخليهم يفكرون يتهاوشون جان يخلي كل وحدة تلم اغراضها وعلى طول بيت ابوها وانا متزوج ثنتين واحيانا تصير مشاكل بسيطة وتنحل في نفس الوقت .بس رجال هلجيل ما عندهم شخصية واكثرهم سكان لمرته وما يفكرون يتزوجون عليهم ومن جدي صارت المراة نافخة روحها على زوجها والدولة ساعدتها وخلتها تشتغل وتسوق سيارة وتطلع مجمعات بدون كفيل والحين قاعدين ندفع الضريبة والمشاكل وانتون تشوفون وتسمعون كثرة العوانس والقضايا الاخلاقية في المحاكم

مع إني مو من رواد المجمعات و رحت السيف في حياتي مرتين فقط

وااااأو عجبتني عبارة بدون كفيل. ذكرتني بعلم الإسلام لما يسالونه عن كفيله يقول كفيل مال أنا نفر كبير

اقول خلك بحالك

وخلك في بيتك وي نسوانك وخذ الثالثة وراونا رجولتك اكثر واتسند ولا تقول رايك

يعني انت ماخذ 2 وتبي غيرك يسوي نفسك

عالج الخلل في زواجك الأول ابرك

ايه والله الزمن تغير

لكن عانس وتشتغل وتسوق سيارة، واجد احسن ليها من تكون متزوجة وعندها ضرة ولا تروح مجمعات بدون كفيل

في قريتي الوادعة الجميله /سويسرا بحرينيه

هناك اكثر من نوذج واعرفهم شخصيا واعرف علاقتهم داخل وخارج البيت يعيشون في وئام وسلااام والحمد لله

الاوليين غير والحين غير

على إيام اول غير كل واحد يشيل بعض يربون لبعض وعادي عندهم يطبخون لبعض يعني حتى الزوج يكون عادل بينهم ومنصف على الحق في الليله النومه مع هذي والا الثانية والحمدلله عاشوا مع بعض في الحلوة والمرة..أما الحين يشنون عليها حرب البسوس ولا بعد مرت رجل صعبه حتى يمكن اتفلت ثيابه في الطريق أو تطلقني أو تطلقها

من أول مو زمن مثالي

أصابع اليد مو سوى أول والحين.

تأمل قليلا و سترى نماذج عكس ما تقول

جارنا الله يرحمه ، في عمر جدي، هجر وحدة من زوجاته و قعد مع الثانية و سجل لها بيت باسمها و يا مسافرة أو راجعة من سفر
و شفت و سمعت عن أمثلة من هذا النمط كثييييييرة من زمن القدامى.
و شفتأ عكس هذا والذي في زمننا....الخلاصة مو كل الناس مال أول أحسن من كل الناس مال الحين

ام السادة

اي صادفني في السفر بالحافلة امرأتين اعتقدت بأنهما خوات لكنهم نسوان رجل وهذا الرجل مات منذ فترة وعنده ابناء منهما اعتقد ان الرجل كان عادل بينهما ولا يظهر حب احدهما للاخرى

مو شرط

يمكن ذلين نسوان ابوي
من قبل بلاوي ومصايب ... وبكل صراحة ما في عدل من عدة نواحي ...
مرة ابوي الهندية آخر وحدة هي المتحكمة ببوي
ولما توفى هي وضرتها سمن ع عسل
مصاااااااااالح

الضره حره

صراحة مااتخيل زوجي وي وحدت ثانية مجرد اتخيل اجيني حراره بقلبي مااقدر اتخيله مصكوك عليه باب مع وحده ثانية ...مساكين لازم بصيرون زينين وي ضراتهم حتي يعيشون خصوصاً بهالزمن الوحده من تزوج ماليها الا زوجها لابيت ابو ولااخو ولاخت....الله يهدي الإزواج كلهم يارب ويعمي عيونهم وقلوبهم عن الزوجه الثانيه هششش هششششش هششششش

افضل تعليق

هش هههههه

ان شاءالله

فعلا احنا الحريم معظمنا نعارض وجود الضرات
عن نفسي اقبل بضرة في حاله لا استطيع ان انجب او مريضه اعجز عن منحه حقوقه
وبعيد الشر .....

شنو ماتتخيلون؟ هالنوعية من البنات هم نفسهم اللي تمشي زوجها مثل الخروف ورا غنمة نعيمي

تلبس شفاف ضاغط قصير وعباية مفتوحة الوسط مربوطة الخصر لماعة تتلصق بالجسد تلفت النظر وتغري المارة من بعيد
حق زوجها مايشوف جدامه بالسوق الا الخروفة البربرة
مو شايفنش فالبيت ولايععة جبده بعد
تكلم قول شي حرك ساكن عطها كف عالاقل
حسسها انك رجال طول النهار وجدام الناس مو بس في الليل و داخل البيت بس
وبعدين هالفرس البربرية تقول ما اتخيل اشوفه مع وحدة ثانية
شلون خليتينه يشوفك عرض منهوك في السوق جدام العامة لين صار بدون غيرة
والله لو مو الفقر جان اعودكم غصب واخد 2 زيادة جان تتعلمون السنع

ذكرتيني بوحده

ذكرتيني بوحده متفلسفة تقول مستحيل أتزوج واحد عنده زوجة و قلبه يصير نصفين لي و لها لا أبغي واحد بقراطيسه يكون لي وحدي بس .... الخ هرارها ، و في الأخير طلعت مطلقة ....ة ، طيب بنفس المنطق من يبغي وحدة مطلقة و كانت على ذمة زوج ..... ، و حاليا الأخت تبحث عن زوج في النت بكل الطرق و الوسائل ، أعتقد اللي يتكلمون بهذه الطريقة مو حاصل لهم زوج واللي ميطول العنب حامضا عنه يقول و شكرا .

عمة صديقتي

تزوج عليها زوجها الله يرحمه
ومن قبل ما يتوفى هي اللي ربت عياله من الثانية اللي كان مسكننها في قرية ثانية
بل كانت تطبخ لزوجته الجديدة والمرحوم كان يجي وياخذ الجدر بارز امبرز لها
ولما توفي الولد الكبير رفض يعيش مع امه وفضل مرت ابوه اللي ربته وحبته
بس البنات صغار فأخذتهم امهم
رفعت قضية تطالب بضم ولدها إليها لكنه حضر للمحكمة شخصيا وأخبر القاضي أنه يفضل البقاء مع من ربته وأحبته وعطفت عليه

قصة

خيااااليه سبحان الله مل شي جايز

اللهم صل على محمد وال محمد

الضرات يصيرون حبايب اذا الزوج صار ليهم حبيب اما اذا راح لكل وحدة بوجه وذيك قالت جذي وانتين قلتين جذي شي طبيعي بيصرون ضرات لبعض بس الحين اشوف واجد ضرات نفس الخوات وي بعض على حسب معاملة الزوج

.....

مافي اتفاقيات سلام .. بس صوب الناس والله كل وحده على الثانيه "...

خاطري اليوم قبل بكره أتزوج على الفرنسية

الواحد مايحب يتزوج وحده ثانيه على الأولى إلا إذا كانت هناك أسباب. مثلا عدم الاهتمام أو الاحترام . طوله للسان ألخ
عن نفسي نعم بتزوج عليها في الوقت المناسب. والسبب منها وليس مني. ببط جبدها وبقهرها وبخليها في حاله نفسيه صعبه ولين طلبت الطلاق بعد بطلقها. يا انا يا هي. مستحيل اضييع باقي حياتي معاها. كل ما شافتني ساكت اتمادت أكثر. ولكن بفاجئها بضره وبستمتع ونا اشوفها منقهره.

عشم ابليس بالجنة

ما يهدد الا الضعيف

حرام عليك

اقعد وياها وصارحها وامتنع عنها جم يوم ليما تحي بالوضع كيف
واذ مانفع مثل عليها انك متزوج فعلا
تحياتي...

ههههه

هههههه ويش يضمن ليك الي بتأخذها يمكن تكون أخس منها

شكلك عندك كبت

ما تقدر على المرة في البيت اتجي اطلعة في التعليقات. باين عليك تخاف منها. ومو قادر عليها

اني الزوجه الثانيه .. خيرا تعمل شرا تلقى

تزوجته بعد مشاكل مع زوجته الاولى كل يومين حطت دفتها على راسها و راحت بيت ابوها و بعد ما اخذته و بعلمها طبعا .. و بحسن النيه شفت في وين المشكله و خليته يغير معاملته معاها و هي بعد خليتها تغير تصرفاتها و يالله قدرت اغيرهم و صاروا سمن على العسل و صار يتشكرني زوجي وايد .. و فجأه تركني و صار على طول معاها لا اشوفه و لا يشوفني و اذا اتصلت فيه يطلع لي بستين الف عذر بس لا اييني . و احيانا يقول لي لا تتصلين اذا انا فضيت باسال عنج ؟؟؟؟؟؟ ويش رايكم هذا اللي يقولون عنه خيرا تعمل شرا تلقى

شكلك انت اللي مو محترمها

نفس اللي عندي ... يقهر ما في اهتمام ولا احترام ..ولا أسلوب صح إلا إذا وراه مصيبة أو يبغيي شي

الأولاد أحق أن يسعدوا

لا أظن ان من أهداف التعدد هو الانتقام من الأولى، وهذا يجرك لتعاسة أكثر. اذا كنت تبحث عن السعادة، فحل مشاكلك ولو بنسبة 20 بالمائة.
أما نيتك على الطلاق، الذي هو أبغض الحلال عند الله، فاعلم إن بعده أولادك يصابون بتشوهات نفسية.
فلا تكن أنانياً، ودع المركب يمضي، فالأباء مضحون، بأموالهم، أوقاتهم، وسعادتهم من أجل أولادهم.

اخوي فكر شوي

ممكن نفسيتها بتتعب في البداية لكن الزمن كفيل انها تنساك خصوصا انك بتسوي فعل بتخليها تكرهك عليه يعني وشش وراها بتزعل جم ؟ سنة سنتين الاهي تمام ومستعدة تفتح صفحة جديدة ويا واحد ثاني وبتاخذ كل التجارب المرة معاك وبتسوي عكسها ويا الجديد وبتعيش في سمن عل عسل وبينقلب السحر على الساحر يا اسباني

الفرنسية

العروس الجديدة اللي بتاخذها فتش تلفونها عقب اسبوع اتحداك إذا ما طلقتها من العلاقات والفسق واشياء مخفية ..يالعمة يا لمفهي وكأنه من الواحد يتعاوش مع زوجته قال بيتزوج عليها طيح الله حظك

ليش لا

الصراحة يالفرنسيات الزواج الثاني راح يقضي على العنوسة. لازم تفكرون بالعقل. اتفقوا مابينكم على الزواج بأخرى عشان مصلحتكم. تري البحريني الفقير المسكين يبغي يساعدكم بالقضاء على العنوسة. تري يقدر يجيب ليه شاميه أو آسيوية. بس احب الخير ليكم. يالله وافقوا احسن ليكم. وعن الدلع. تري اللي بياخدها الثاني فرنسية منكم وفيكم

مافي هالنوع من العلاقات

الا نادرا جدا

من تجربة

عندما تزوج زوجي هجرني و هجر أولاده من عام 2011 و إذا كلمته في التلفون يصارخ فقط الاتصال للضرورة القصوى و إذا صار مشاكل معاها جى لي و إلى أبنائي و فرغ الغضب فينا و ماديا تنقصنا أشياء واجد فتعطيني امي أو جارتي أو خواتي ..

زائرة 44

الله يساعدش اختي .... اني مريت بطفولتي بماسي وللحين بسبب نسوان وابوي وعمتي .. وللأسف ما كانت امي ويايي تدافع عني خذوني منها بالمحكمة ..
أهم شي أتحملي بعيالش وتدافعين عنهم ..
الله يخليهم ويخليش

اي فيه وشفت

تو من يومين جاين لي ضيوف اسألهم من زوحه فلان فيكم الاتفول ثنتينا زوجاته
ومع بعض شحلاتهم ماشاء الله
اسأل نسيبتهم عنهم الاتقول ماشاء الله ياكلو ويجلسوا مع بعض واولادهم عادي مع بعض وكل وحده عيالها تسمي الثانيه يمه
ماشاء الله
لكن عن نفسي مستحيل أرضى هذا الشي لنفسي

الله يسلمج

هذا يسمونه حلف الناتو.

لفتح مشروعاً ثانياً؛ لابد أن يكون المشروع الأول ناجحاً ومربحاً

لكي ينجح الزواج الثاني؛ لابد أن يكون الزواج الأول ناجحاً، والأجواء فيه صحية، ويكون بين الزوجين حب وتفاهم.
أما من عنده مشاكل مع زوجته الأولى؛ فزواجه من الثانية سيعقد المشاكل أكثر.
فليكن هدف الزواج الثاني لمصالح سامية، مثل: انجاب أطفال أكثر، القضاء على ظاهرة ازدياد العنوسة، المطلقات، الأرامل. أما اذا كان بدافع الإنتقام، اشباغ للغريزة، للحصول على أموال الزوجة الثانية. حينئذ، سيكون هذا الزواج محكوماً بالفشل من البداية، ولا يلوم الرجل الا نفسه.