من كثر الطلبات الي يطلبونها والاشياء الغريبه والعجيبه قمت اشك ان اصحاب المكتبات هم نفسهم المدرسين والمدرسات الي طلباتهم ماتخلص

وين أيام أول

قبل دوام المدارس نروح نشتري كل الاغراض لان ندري ان المدرسين ما يتشرطون في شي وبعدين المدرس ما يطلب ازيد من "دفتر وملف" بدون تحديد اللون وغير هالاشياء اللي ماليها داعي ..أما طلبات المدارس احين حتى الجامعات ماتطلب شغلات جدي كأن مو كفاية ثقل الشنطة والمشاريع يتشرطون لازم مجسمات ووسائل وفي النهاية ينقط شغل وتعب الطالب في الخمام!!!

حقيبة المدرسة

الشنطات ثقال على الطلبة الابتدائي نبي حل

الدوام المدرسي

اتمنى من الوزير إرجاع الدوام المدرسي للمدارس الإعدادية والثانوية الى الوقت السابق
الصراحة نرجع من المدارس تعبانين ما نقدر نسوي شي من التعل

اعانة ولي الأمر

أتمنى توفير القرطاسية مستقبلا من قبل الوزارة بالمدارس

اتمنى من المعلمين تنفيد قرار الوزير

حقيقة متطلبات الدراسه مبالغ فيها .. والضحيه ولي الامر…

صح طلبات ما لها داعي

فعلا يا سعادة الوزير .. يتم اثقال كاهل الطلاب باشياء مثل المطويات والمشاريع التي لا دخل للطالب بها .. يتم عملها من قبل ولي الامر بالكامل ويصرف علبها مبلغ .. والطالب شغلته بس يوصلها المدرسة. . وفي نهاية الفصل مكانها القمامة

اوافق

ويش خانه الانشطه الي من المكتبات في مدرسين يعجبوني مثل مدرسه لانجلينزي في مدرسه الحجره صدق ادرس اجيال الله يعطيها العافيه والنشاط هو على الدرس وجيب الطالبه الاغراض ويتم عملهم في الصف ويترسخ المعلومه

كمل جميلك

كمل جميلك وانظر في سالفه تمديد الدوام ترى بعد مرهق بالنسبه للتلاميذ حاسب بعد لطلبه مره وحده وي أولياء الأمور

لفته مهمه

القرار يأتي متأخر خير من ان لايأتي ونتمنى تنفيذ الامر بالشكل المطلوب
مع تحيات
أب خمسة طلاب

انزل المعترك وشوف الطلبات وثانيا صحح من وضع المدارس بنموت في الحر مكيفات ما تبرد اكل عليها الدهر يعني

كله طلبات؟؟؟!

المفروض كل مدرسة تعطي الطلبات ويه استلام الشهادات ، على أن يكون الطلبات متفق عليها لجميع المدارس ، وليس كل معلمة تتفنن في الطلبات وحدة دفتر 100 وفايل، وبعضهم حتى الفايل نوع معين ولون معين ، وكأنه أولياء الأمور ما عندهم إلا روحة ورجعة إلى المكتبة

تحسين الميزانية من خلال عصر ولي الأمر

شوفوا الروضات مستخفين طالبين سماطات وشدات ورق وصحون وشريط لاصق عريض وصابون وكلينكس وغيرها من الأدوات اللي المفروض الروضة اتوفرها وخاصة انها توها رافعة الرسوم

والله ارهقوني يا سعادة الوزير

سعادة الوزير مشكور ع هالتوجيه وحبذا ان يتم التركيز على مدارس البنات اللي طلباتهم ما تخلص من بداية العام الدراسي لاخر يوم كل يوم طلب غير شكل تعال المعلمة تبي ملف مقاسه محدد اذا زاد المقاس شعره ترجعه المعلمة وتعال جيب لنا ملف لونه شاااااذ وغصب تجيبه انزين لو جبت لون ثاني ويش بيصير يعني ليش هالاصرار على طلبات لا تقدم ولا تأخر ؟؟؟ ارحمونا يا معلمات مدرسة الدراز الاعدادية للبنات

كمل جميلك

نبيغي منك
ياوزير بعد تقلل من تمديد الدوام الدراسي بعد كمل جميلك مو بس التقليل لأولياء الأمور

هذا الشي لازم يتعمم على كل المدارس طلباتكم لو مسجلينهم في مدرسه خاصه احسن وغير تجليد الكتب بعد

يمدي

يعني توه الوزارة والوزير منتبهين يمدي تخلص السنة وينشرون الخبر من زمان انصمو الابوة وبيزيدون وتوها السنة

دور المدارس

مدارس بها معلمين سينفجرون من كثرة الضغوط لمديرات متسلطات لا ترحم ولا اتخلي رحمة الله تنزل

والمعلمين

احنا المعلمين بنموت من الضغوط وطلبات الإدارت ارحمونا

الغاء المشاريع

نتمنا من الوزير التربيه والتعليم بالغاء المشاريع من المدارس حيث ان الطالب لا يستفيد منه واغلب المشاريع ترمى في القمامه . وثانيا نتمنا من الوزير تقليل ساعات الدراسه حيث انه تعليم وليس توظيف وشكرا لك يا وزير التربيه على هذه المبادرة الجيدة من قبلكم حيث خففتم اعباء الطلبات

المفروض

المفروض الحكومة توفر ليهم كل شي حتى القرطاسية
والمشاريع ما ليها لزمة المفروض الوزارة تمنع طلب المشاريع لانها تكون من تعب ولي الامر وما تستخدم في التدريس تنقط وهي جديدة

تختلف شروط المدارس من واحدة لاخرى

تختلف شروط المدارس من واحدة لاخرى رغم من انها في دولة واحده الا انها تختلف في شروطها ومتطلباتها من حيث الزي فهو موحد فاما الاحذية تشترط الالوان والملفات وغيرها من ذالك فكل معلم او معلمة تتطلب انت تكون دفاترها بلونها المفضل حتى يجمع الطالب في حقيبتة قوس قزح من الالوان وحتى ذالك يكلف اوليا الامور مبالغ طائلة،فقبل بدء الفصل الدراسي يبدا اولياء الامور بشراء جميع متطلبات الدارسة وبعدها في اول يوم دراسي يتغير كل ما هو علية فيصبح كل ما اشتراه اولياء الامور غير صالح للدراسة فااعان الله الفقراء والضعفاء

ياسلام هههههه

مدرسة السنابس الاعدادية للبنات حتى قلم السبوره طالبين!!!؟
ليش الله اعلم؟؟؟؟

ارهقونا يا وزير

ارهقونا وانرهقنا وسنرهق نحن مرهوقون

يعني مو الوزارة اللي تطلب. ...

مطويات متعبة وباهضة الثمن ومصيرها القمامة؟
شي خيالي يصير في المدارس
المفروض يتكنسل تكريم المعلمات وحفلات من قبل وليات الأمور صار إجباري على كل طالبة ووالدتها تقدم هدية ومشاركة لمعلمة معينة على أساس تعبت طول السنة كأنه مو واجبها التعليم
طلب مطويات ومشاريع سيديات واختراعات وأشياء عمرها ما تفيد الطالب وتكسر ظهر أولياء الأمور وتعدم ميزانيتهم
وعلى جانب ثاني ترى في ناس مقتدرين وناس ما تقدر
وشي آخر الوزارة بعد تخفف من المقررات الدراسية لأنه تهلك الطالب والمدرس

اي و الله

بعض المعلمات يطلبون اشياء لا يقدر ولي الامر على توفيرها
لازم اتكون الادارات المدرسة حازمة مع بعض الطلبات الغير معقولة او الغير ضرورية

اي والله

اذا الشنطة وزنها حتى ولي الامر ما يقدر يحملها تبي ينقصون الطلبات خلهم يعطونهم جدول المواد أفضل

من زمان اشترينه طال عمرك واعلنه فلاسنه وتسلفنه .

جزاه الله خير

أحسنت ورحم الله والديك ما قصرت كلك خير وبركه

الطلبات

لازم تشوفون حل جذري لهالمشكله طلبات المدرسات ماتخلص مشاريع على طول السنه واللي ماتسوي تبهذلها المدرسه مايدرون ان اولياء الأمور على قدر حالهم ولا المصيبه اذا سوت الطالبه مشروع وماتلقى اي تشجيع من المدرسه ماتلقى غير التهزيئ وياليت يستفيدون من المشاريع كلها تنقط الله يعزكم في الزباله .. مشروع يكلف فوق 10 دينار عشان درجتين ولا خمس .. مدرسة النويدرات معروفه بأرهاق الطالبات بالمشاريع مايدرون انها تكلف وين وزارة التربيه عن هالمهزله .. وان سألناهم يقولون اجباري لانها أوامر وطلبات الوزاره

لا يلتزمزن !!

بل أن بعضهم لا يقبل أي شيء اشتريناه للأولاد ... ويضع شروطاً مبتكرة ... فنضطر لرمي وخسارة ما تم شراءه ... وشراء ما يريده المعلم أو المعلمة من جديد ...
ما يعني خسارة مضاعفة !!
لا ينطبق هذا على الكل ... فأغلب المعلمين يراعون الطلاب وأولياء الأمور ...
بس كل بداية عام أو فصل دراسي ... لازم يطلع لك أحد لطيف ..

بعد ما ذبحونا! !!

خلاص طلبوا وقصفونا بعد والتجار استغلت صح توكم تتكلمون!!وخصوصا المعلمات المعلمين يهونون

من زمان أرهقونا وخلصو .. ما ظلت حاجة الا طلبوها وكل بالتقسيط .. يوميا يطلبون حاجة

العرادي

مدرسة عراد الابتدائية للبنين صار ليهم ثلاثة ايام بدون تكييف يشتغل ساعة من الصبح ويبند يا سعادة الوزير ناخذ اولادنه كأنهم طالعين من حمام سونه

إرهاق أولياء الأمور

أشد إرهاق أولياء الأمور هو الدوام المدرسي الجديد الذي أرهق أولياء الأمور والطلبة معا الذي أثر على التحصيل العلمي ياوزيرنا الموقر

ابواحمد

إرهاق طلاب بالوقت الي ذبحين طلاب

قرار ممتاز

قرار ممتًاز ويجب مراقبة المدارس عن كثب ومعاقبة من يقوم بارهاق الطلبة بالطلبات التعجيزية وكأنما يطلب أحدهم إحضار بيض الصعو!!

يرجي الالتفات والاهنمام

قد يكون هناك طلبات تبهض اولياء امور الطلبه وقد ترهقهم ولكن هناك ماهو اهم الطابور الصباحي الذي تطول مدته فوف النصف الساعه مما يبهض الطلبه ويرهقهم في هذا الجو الحار حيث ينتهي ااطابور بتصبب العرق وبعدها الدخول بالصفوف وهي بارده ممايؤثر على صحتهم ويسبب لهم الارهاق علما بان سعادة وزير التربيه حدد المده بخمس دقائق للتفقد والسلام الملكي

طلبات

أتعبنا كل وحدة اليها فايل غير ولون غير والحجم والشكل غير

روضه في جدعلي

تطلب علبه اقلام سبورة وكلينكس وعلبه صابون سايل في كل فصل ورسومهم 45 والروضه تحتاج لترميم وصيانه

صح القول ياوزير

ترى بعض المدرسات الصراحة مصخوها يطلبون آلة حاسبة 2 و لم يسألونا الطلاب ليش تقول كل وحدة ليه خاصية تختلف و سعر الوحدة 7 دينار و انا عندي توم في نفس الصف يعني 28 دينار و انا متقاعد و راتبي 320 دينار نتمنى من الوزير أن يراقب هذا النوع من الدرسات والله يكون في عون الوزير يارب.

ما قصر الدكتور ماجد النعيمي

شكرا على التوجيهات

متاخرين

وايد تأخرتوا على التوجيه .. الأولياء تسلفوا وخلصوا

بصراحة زيادة مصاريف

أودّ ان أوصل صوتي إلى الهيئات التعليمية في المدارس ليس هناك داعي إلى طلب متطلبات صعب الحصول عليها وإن أمكن سوف ندفع المبلغ للمدرسة لكي تقوم بشراءها

ماقصروا المدرسات

المدرسات ماقصروا الموجز عاطينه اياه من البداية كل وحدة تشرط فايل ولونه غير انروح المريخ ونحيب الالوان الي يبونهم

خطوه جدآ جميله بس للاسف الطلبات كثيفة يعني الله يساعد اللي عنده عائله ..