زائر 127 .. احمد ربك الله عطاك الفرصة انك توصل للي وصلت اليه غيرك لو مكانك اكيد بيكون افضل واحسن منك تدري ليش لانك كلام ما تعرف تكتب وتعبر ههههه بابا احنه دارسين واهلنا تعبوا علينا ودفعوا قروض عشان ندرس انا في عائلة من 12 شخص اخوة واخوات كلنا دارسين وبعضنا برة درس ثنين منه بس نشتغل شغلة عدلة وفي وزارة الباقي حيالله شغلة اي كلام وللحين نركض ورا رزقنا الي حضرتك قاعد تتفلسف علينا ..

المشكله بكبرها في الحريم انا عن نفسي احس زوجتي تحب تبذر الله يهديها..اما بخصوص الاخ هدا واحد ما عنده سالفه ولا يعرف يدير اموره

القناعه كنز لايفنا خلك قنوع بكل شي حتى في الاكل

للأسف بعض الحريم إلا أكلها في المطاعم هي وبيت أبوها على ظهر الفقير وآخر الشهر يدور من يسلفه

الموضوع كله يتلخص في " كيف تسيطر على نفسك" مهما كان راتبك مهما كان نوع حياتك تبقى انت صاحب القرار وتعرف شلون تنظم اولوياتك.

كلامك صحيح و لكن الناس تحب تعبر عن معاناتها و مشاعرها

خارج عن ارادته وسيطرته وهناك اشخاص لايرغبون في الاكل لو قدمت لهم البط والوز وشاي الوزة احسن شاي .

بصراحة كل شي غالي و الرواتب كحيانة
طبعا مو لازم كل يوم من المطعم بس شوية تغيير مطلوب
يعني ممكن نحضر الاكل في البيت و نحطه في بارسلات و نحمله ويانه على ساحل البحر او حديقة و نستانس حتى لو على قدنا ما فيها شي
وش نسوي يعني على الموجود نمشي روحنا
الحمد لله على كل حال

زين تسوي
وش حاد الواحد يطالع غيره و يشقي نفسه على الفاضي
الفرق المادي يفرض نفسه على الجميع و مهما حاول الفقير يقلد الغني ما راح يقدر يوصل لمستواه ابدا و لكن يصير مثل دودة القز لما تخلص لف تموت في محبسها
اتقوا الله في انفسكم و تقبلوا وضعكم مع الحمد لله و الشكر

في البحرين حتى لو معاشك أرتفع شوي، وأنت تخطط لمستقبل العائلة يروح حق أقساط سكن، مثل شراء شقة-بيت أو أرض أو بناء. وإلي يقول رفاهية يبي له كفّ! يعني تعيش حياتك معاشك حق السكن ومصاريف البيت اليومية.
بينما الأجنبي يستلم علاوة سكن زيادة على المواطن إلي في نفس المنصب والمكان.
لأن الناس يئست من السكن المستقل فصار معاشها يروح للسيارات الفاخرة والمدارس الخاصة لحد الأفلاس. وكل واحد يقلد الثاني في الفشخرة. أنا أعرف ناس مستعدة تطلع سيارات وكالة فوق العشرين ألف، ولا تشتري أرض. للأسف هذا بدأ ينتشر.

هو يمكن ما يقدر بس يطالعهم ولا يأكل ،اني اكل اكل على قد ميزانيتنا بس احس اكل غصبا عني واستمليت من الاكل الرخيص المكرر النفس تشتهي الأكلات اللذيذة صراحه عدلوا معاشات الناس مو زين بعد جدي ناس تأكل لان عندها فلوس وناس بس تطالع

زوجي راتبه 300
عليناقرض سياره
وعندنا قرض بناي شقه وعندنا اطفال ثلاثه
مصاريف حفاظات وحليب
ا
يفضل من راتب ويش ولا ويش لو مالغلاء الله لاطف حالنا فيها
ابغي مره بس فشهر نروح مطعم قانعه
ابغي افصل عبايه ثياب

ابغي اتنفسسسسسسسسسسسسسس

راتبه 300 جان مشى حاله بسيارة مستعملة!

لازم تشتغلين و تساعدين زوجك
يد وحدة ما تصفق

انا بحريني والحمدلله عندي المسكن اللائق والعيال مدارس خاصة وفي الاسبوع مرتين او ثلاث نتعشى ونتغداء بكل مكان يتم اختياره والتغير جو اسري وسفرة كل سنة وراتبي يكفيني ويزيد اللهم احفظ نعمتك من الزوال بس بحريني اجتهد وتعب ع عمره مش يتحلطم ويلطم .

بالضبط لا دراسة و صياعة وبعدين يقول لك راتبي 300 دينار انزين ويش يسوون لك ليش ماتعبت على روحك و اجتهدت و ثابرت مقدرتك على لتحلطم

يبين انك بحريني، اصلي من كلمة مش خخخ

اي يبين انك بحريني

لا هذا مستوي اصل وفصل !

اي راتب هو راتب البحريني يسمى راتب البحريني يموت ألف مرة باليوم كفاكم هطرقعات على الفاضي .

الله يخلي الوالدة
كل شي تسويه في البيت و اكل اصلي لا يعلى عليه
الصالونة و المجبوس و خبز الرقاق و القيمات و كل شي من البيت حتى الطعمية و نخي بشير تسويه

صديقي ما شاء الله أمه مو قصرة وياهم كل ريوق شعبي من البيت و كل طبخة شكل
بلاليط و عصيدة و خنفروش و و و
يجيب ليه كل يوم في الشغل بارسل من البيت و يكشخ و ما بكلفهم واجد
الله يوفقهم

هذلين بظلون طول عمرهم عايشين في الفقر ولو يبنجر عليه تاير سيارة راح يدور محل يسوية له بالاقساط

المبذر دايما فقير

عندي زميل عمل آسيوي كان ياكل اكل بسيط و يسويه بنفسه فسألته مرة ليش تاكلون اشياء بسيطة مو مثلنا ليل و نهار لحوم و مجابيس و و
يقول احنا ناكل عشان نعيش و مو نعيش عشان الاكل
و زميل آخر يقول احنا نقول لاولادنا لا تاكلون واجد تصيرون مثل العرب بس همهم العلف بدون انتاج

لكن صدق غريبه الا كل يوم مصورين ليك الكيك وكوفي من ستار بوكس وووو
الله يكون بعونهم

حتى في سالفة البترول قعدو يصيحون مولاز ممتاز وسيارة مو جديدة حط جيد ومش عمرك

الحقد والحسد افة، والامتيازات اللي يحصل عليها الاجانب هم افة ولاحياة لمن تنادي لاوزارة عمل لانواب ولاشي

يا كثرهم والله و ياغباءهم
افكر على الي كل يوم و الثاني غذاء لو عشاء بالمطعم والريوق من المطاعم الفشخرة حق لفشار والتصوير
كل يوم الوجبة تكلفكم كم زز ليش التبذير ونص الشهر تصيحون
الي بالسناب وبالقروبات وغيره بيطالع وبيحد وبيعطيك نغزات وما تتهنى بالقمة في بطنك وتخسر فلوس على الفاضي
لين فلست تختفي من يسئل عنك من يحاتيك
ولين قلت لهم دفعو صدقة لو خمس ججانهم وجع البطن والماحي ويلفون على 100 شيخ جان يعطيهم الارخص
ههههههه

عجبني هالرد وكلام صحيح مئة في المئة على الطاري اعرف ناس يسرفون فلوسهم على الفاضي وبعدين يرووحون لرجال دين وجمعيات تساعدهم وغيرهم أولى بهالمساعدات

يوم رفعو سعرالبترول جفة ناس مصطفين عشان يوفر له جم دينار لكن لين دش السوق الا له حاجة والا ماله حاجة يشتريه اسراف بلا حدود ملابس عطورات

كل طبقة من طبقات المجتمع تحب تعيش وترفه عن نفسها بس المفروض بحكمة يعني الا راتبه يادوب يقدر يدلع روحه ويطلع مطاعم بس يحدد جم مرة باللسبوع مثلا انا معود عيالي طول الاسبوع الاكل البيت لكن الجمعه يوم مفتوح يطلعون يغيرون جو وعلى قدنا نشوف شنو الميزانية نروح والحمد لله بداو بروحهم يجمعون من مصروفهم اليومي حق الجمعه واحلى طلعة ووناسه عساها لو شاورما وقعدة على البحر نرجع سعادتنا اكثر من لو رحنا اغلى الاماكن لان مافي على البساطه واحين حتى ربعنا الا من طبقات راقية بدأو يعيشون اجوائنا لانهم يفقدونها

انا 13 سنه موظف في شركه راتبي 230 دينار وانا ساكن في شقه اجار وعندي 3 اولاد وصديقي قطري نفس وضيفتي في قطر يستلم 300 الف ريال قطري شوف الفرق في دول مجلس التعاون

بسكم جدب عاد كل واحد بيموت وكل كلمة والثانية بس مقارنات ويه قطر

مشكلة..من شريت الارض و انا اعاني الامرين..و لكن الارض ضرورة لمستقبلي و مستقبل الأولاد

صحيح
انت في المسار الصحيح
احسن من المظاهر اللي ما منها فايدة

اسمح لي انت غلطان
ليش تشتري ارض وتعيش في ضيق هذه ثقافه غلط وللأسف متواثة لدى الجميع في البحرين
اولادي واولادك يدبرون روحهم اما انا اعيش في ضيق وشقى وتعب وتالي الاولاد يفتلون فيها لا
لا ويمكن ما يزورون قبري
اذا كنت بخير اخذ ليهم ارض وبيت بعد اما اذا لا ما اخذ ليهم

إعذرني .. مثل عقليتك وصلتنا إلى هالحال .. ما في إحساس و لا مسؤولية .. إذا الحين بطلعة الروح اتحصل بيت .. بكرة شلون ؟؟!
هذا بلدنا و هذي ظروفه ، مجبورين اذا نبغي جودة عالية ان بنفسنا نتكفل بالسكن و الموصلات و الصحة و التعليم .. بدل ما نتفرغ للتطوير و الإبداع ..
اللي عنده فرصة يسوي شي لأولاده لا يقصر .. ﻷن محد يدري شنو مصيرهم .. على الأقل استروهم في بيت .. و قولوا الحمد لله

عجل اشلون يأمن مستقبل عياله؟!

هذول نسميهم باللغة العافية البحرينية ،، أصحاب المخوخ التنك ،، مظاهر على فشوف ،، وراء البطون وبالاخرى وراء الفوشرة والإتيكيت الكاذب، ناس ما تفكر في باجر همها فوشرتها وبطونها و ياليت يأكلون، اقتصدوا في مصروفاتكم ورواتبكم ،، وإذا زوج وزوجة تعاونوا في بناء مستقبلكم ومستقبل أبنائكم ،، اطبخوا في البيت هي صحة ونظافة وعلى كيف كيفكم وبأي وقت وهي تقليل مصاريف على الوجبات السريعة وهي تقليل مصاريف سيارة وبترول ولباس كشخة وو،،، احسبوها من الجذور ،، عاد جان في مخوخ تشتغل ،، (بيضة مقلية بدينار وفوق ) وش هالنصب

للاسف قليل اللي ممكن يوعون كلامك
الاكثريه منجرفة ورا الفشار و التقليد الاعمى

المفروض الى يشتغل رجل امن يجب على الجهة المسؤولة ان توفر له وجبات الطعام - مثل ما نشوف وزارة الداخلية توفر الوجبات الى رجال الشغب ليل ونهار وجبات ومن اغلى المطاعم .

غريب عجيب هل ال 700 او 800 دينار تعتبر دخل عالي ، ترى ماتسوي شيء هالأيام وصاحب هالراتب يعتبر فقير اذا كان رب اسرة و يصرف على بيت .

فما بالك براتب 270 دينار؟؟ اتق الله يا هذا واحمد واشكر ربك على النعمة

الحمد لله حمدا كثيرا ، انا فقط متعجب من تصنيف ال 700 و 800 دينار من ضمن الدخل المرتفع مع انها ماتساوي شيء هالأيام وتعتبر دخل أقل من متوسط .

700 و800 بالنسبة للبحارنة غني تعتبر ترى

انزين انا بحراني ودخلي الشهري لا يقل عن 4000 دينار ويالله ملحق على دراسة الاولاد في الخارج والصرف على البيت .... الخ ، يعني 800 تمشي زوج و زوجته و 3 او 4 أولاد صغار لكن ماتمشي عائلة كبيرة و أولاد كبار وانا بنتي تدرس برى طب تحتاج معدل شهري 800 دينار .

مولازم تدرسهم برا اذا هالشي يضغط عليك احنا حتى جامعة خاصة هني مارحنا الحمدالله درسنا فالجامعة الحكومية وباعفاء بعد الحمدالله تخرجنا

الحمدلله
راتبي 400 كل يوم أودي ريوقي ومااشتري وجبات الابالويكند لين نطلع

باؤك الله فيك
انت شخص فاهم و مدبر صح

شطور

اكتبوا مقالات عدلة، محد يبي يعيش في فرق عن الناس لا في اكل ولا في شرب الكل يبي يعيش مثل الثاني مادورت الا الفقير ، جان كتبت عن الأغنياء وترف معيشتهم

الرزق شي من رب العالمين و ما علينا من الاغنياء
و الموضوع يقدم نصيحة للشريحة الاكبر من الشعب
من راقب الناس مات هما
و الانسان بتوجب عليه مد رجله على قد لحافه

روب و خبز دبل بالسمسم للريوق 150 فلس مثلا
و الغدا نودلز و شوية خضرة ب 500 فلس مثلا
و كل يوم شي بسيط يمشي الشغل و التدابير واجد
الاقتصاد نصف المعيشة
النفس تحب كل شي لذيذ
بس الصرف على قد الميزانية
العين بصيرة و الايد قصيرة

الله يغنيك من فضله

في كثير من الاكلات المناسبة و سعرها معقول
خبز و جبن و واحد كرك 200 فلس
صحن برياني صغير و واحد عصير قواطي 900فلس
لا داعي لتقليد الغير
القناعة زينة

اكيد على قد اللي عندي بعيش
ادا بتسلف لبيت او تعليم عيالي هذا شي لابد منه
بس عشان اكل اذبح روحي ليش
انا انسان مو همها علفها مثل الغنم

سالفة اخوي كل يشكي الحال وفي نفس الوقت زوجتة في الصالونات التجميل ياتسوي ليزر حق وجهها تكلف الجلسة 80 دينار وحمامات مغربي ووالخ وكلة هو الي يدفع وهي ماتشتغل

لا بد من المصارحة بين الزوجين من البداية و حتى قبل عقد القران حتى لا تظهر مشاكل هم فى غنى عنها
خصوصا مع كثرة متطلبات الحياة العصرية و التي يعجز كثير من الازواج على تلبيتها بسبب الرواتب المتدنية

اللي يحبك ما يتعبك
لو الزوجة تهتم في تعب زوجها و تشتري راحته ما كان وصل لجديه
بس في نسوان تشوف ال جال مثل الصراف الآلي كل سحب و سحب

التجميل مهم ع الأقل يفيد وما يضر لكن كثرة الاكل تسبب أمراض وكوني بنت اشوف على الصالونات اكثر من المطاعم

ولد زويد
أنا ما يقهروني إلا هؤلاء كل يوم قوطي ستاربكس أو كوستا يحسسك أنه بريفسور زمانة وهو طيط مخة تنك بس على شان لفشار شوفوني إذا ما أشرب مخي لمتنك ما يشتغل طيططيط

ههههه
فعلا في اوادم متنكة

هههههههههههه

هذا لا يعتبر اسراف لانه يشتري حاجته وياكلها - الاسراف الذي يزيد عن الحاجة - ولكن لان مدخوله الشهري محدود لذلك علية ان يعادل ميزانيته - وفي النهاية راتب 250 دينار لا تكفي حتى الاشياء الاساسية . وسووو مثل ما سووى عادل الامام الارهاب والكباب

مأسااااااة حقيقية !!!!

نعم
يقول الله عز و جل " لا يكلف الله نفسا إلا وسعها"
يعني عيش على قدك و رسح بالك
الناس في الماديات أوضاعها مختلفة
في الفقير و الغني و الملياردير
الله يقسم الارزاق
لا داعي للتقليد

اني شغلي من 8 الى اربع..اروح الشغل حاملة ليي ريوقي او اتريق في البيت اذا يمدي.. واحمل ليي وجبة خفيفة للغدى.. سلطة او معكرونة او روب بالاضافة الى اجباس وكاكو بعض الاوقات.. ليش اصرف نص معاشي على وجبات مطاعم.. في الويكند ممكن ان ادلع روحي شوي واطلع اكل من برى او اطبخ في البيت

كلام سليم 100%

مسكين هالصبي فضحتونه ولا عليه .. أتصور صغير بالعمر توه متوظف مستانس بالراتب ويعوض سنين الحرمان أيام يعطونه مصروفه بالقطاره.. مرده بيكبر وبيعقل وبيعرف يدبر أموره ..
أني بصراحه أكره التبذير بكل شي .. لانه النعمه زواله .. لازم نحمد الله عليها ونقتصد فيها .. ولانه أكره شي بالدنيا عندي السلف .. فلازم كل شهر أدخر مبلغ من الراتب ولو شنو خاطري فيه ما أصرفه .. لانه أحيانا يجي شهر تجيك مصاريف ما تتوقعها فلازم يكون في شي مدخر عشان ما احتاج أحد حتى لو كان زوجي.. والله يعين الفقاره بهذا البلد

الموضوع للتدبر و تغيير طريقة التعامل مع الراتب
و الشخصيات مجرد امثلة من الواقع المر
توصيل الفكرة لازم يحتاج الى قصة احيانا

تحليلك ممتاز

ياحجيي يقولون لك متزوج وعنده عيال

ابو يوسف
حسستوني بكلمة ترف انه يشتري سيارات فاخرة شفتون يا جماعة صار الأكل اله ب4 دينار واجد علينا واحنا في بلد غني لكن يوم الحساب كلام ثاني

التفاوت في المستوى المادى و الفكري و كل المجالات موجود بين الناس في كل الازمان و لكن التصرف يكون بحسب الامكانيات

ما فيها شي ، كل واحد لازم يدلع روحه ويستانس حتى لو يوم واحد ويتمتع براتبه ، عيل ليش يشتغل طول الشهر ويتحمل الضغط النفسي ؟! والله سالفه

نعم بقدر الاستطاعة

القضية سالفة تدبير و مزاج
2 سندويش فلافل مع شاي كرك أشهى من كلاب سندريش مع عصير طبيعي بقيمةً دينارين

مالك حل يا ولد الديره

ممتاز ... تدبير صحيح و بدون سلف من أحد

لا حول. و لا قوة الا بالله الحمد لله اوه زين يمديه يتفلسف و يتدله بالراتب مايمديك بن عمك جوف الحين الراتب طار وللحين ما نزل شلون الله اعلم هو ما له جناحين بس يطير قبل اونه قبل ولادتة يطير سبحان الله

احنا محسوبين خليجيين بالاسم وجبة !! ممكن تفلسنا تخلينا على الحديدة تبا لهذه العيشة والحمد لله رب العالمين .

قول الحمدلله لايخسفك

أنا عايش بروحي أطبخ ليي كدر عدس وأحطه في الفلاجة ويومية اتعشى منه ويكفيني مدة أسبوع

ربي يرزقك الزوجة الصالحة والذرية الطيبة
بحق محمد وآل محمد
أصعب شي....انه الواحد يقعد وياكل بروحه

و هالشي ما يمنع ان الواحد ما يصير يحرم روحه من كل شي ان خاطره يغير مرة مرتين بالشهر ما يضر ان بيرفه عن نفسه و عياله لكن بحدةدو معقولةو بجدي الواحد يقدر يضمن بنهاية الشهر ما يبطل بوزه لغيره و يتسلف بسبب كماليات و الواحد لازم لو ويش راتبه يدخر منه جزء بسيط حتى ما يصيده هالمواقف لو ٥ دينار شهرياً تدخرها تنفعك للطوارئ ان تجمع لك مبلغ حتى لو مضغوط مادياً تعود نفسك على هالشي بتمشي صح

اتفق معك

و الرجال مثل المرة محاسب على هالشي لازم الاثنين يتعاونون بهالممسئولية و ينضمون مصروفاتهم و يهدون الفشار بهالسناب و ربعه هالشي الا ضيع بيوت على هرار و مصروفات تخلي الزوجين مضغوطين مادياً حتى لو هم مدخولهم مليون ان ماعندهم تنظيم ما بيكفيهم الراتب و تقولون الجهال؟ الجاهل اذا تعلمه على القناعة و ان هذا المووجود و تفهمه بيفهم بس وين دام احين التربية كل على الخدم و مايدرون عنهم كل بالتلفونات لازم الواحد يراجع نفسه و يشوف اغلاطه قبل كل شي حتى يقدر يعيش مد رجولك على قد لحافك

راي صائب

مافي على طباخ البيت لو كل واحد هو و مرته ياخذون ماجلة البيت و المرة و الرجال يعتمدون على طبخ البيت كل شي بيصير موزون لو تحسبونها بيوفرون واجد بس هالزمن كل ما يعرفون يطبخون و يبون من برا و يصيحون ليش الامراض زايدة لو كل وحدة تسنعت و حطت ايدها بالمطبخ كل شي بيصير اقتصادي و اكل نظيف و صحي و ويش بيضر المرة ان جهزت الريوق و الغدا و العشا لرجلها و عيالها حتى لو كانت تشتغل في شي اسمه تنظيم وقت و هالشي بهالزمن وي هالتكنولوجيا ضايع طول اليوم على هالبرامج و كل مافي ماعندهم وقت

تفهم من خوك؟؟؟
في ناس تحب الراحة و يبون يشتغلون في البيت
الحياة تعاون و اضحية من الجميع
انت تشتري و توفر و عي تطبخ خصوصا غير الموظفات
تبين السفر و السيارة و الموبايل و مصروف شهري ساعدي زوجك في البيت عشان يقدر يوفر لك اشياء اكثر و افضل

الغريب في الأمر الأجانب مع إن رواتبهم عالية أكثر من 1500 دينار لكنهم يجلبون واجباتهم معهم من المنزل

لان يفكرون يشتغلون في شبابهم و بدخرون لوقت الكبر فتشوفهم على طول عايشين مرتاحين

ترف
الاوادم كل يوم مطاعم في كل الوجبات مادري ليش يسووون لهم مطابخ في بيوتهم

ديكور في البيت

الحمد لله راتبي ممتاز جدا و لكن أدفع جله للبنوك و دراسة الأبناء في الخارج.. ما يتبقى منه لروشن البيت و الإستمتاع بأحلى الأكلأت في أفخم المطاعم مع عائلتي..حياتي لا تختلف عن حياة المواطن اللبناني الذي يتبع المبدأ القائل أصرف ما في الجيب يأتيك ما في الغيب..

" لا تجعل يدك مغلولة الى عنقك و لا تبسطها كل البسط فتقعد ملوما محسورا"
الاعتدال مطلوب
النعمة زوالة و ما في شي مضمون وفر لك كم فلس لليوم الاسود
كان راتبي في احدى الشركات يتعدى ال 800 دينار و بعد ما فلست الشركة الحين اشتغل ب 350 دينار
الحمد مضبط نفسي بالصبر و القناعة

زائر 70.. شكرا على النصيحه.. سرق مني مبلغ كبير في الشركات الوهميه فأصبت بعقدة التوفير و أخذت على عاتقي صرف كل مبلغ يتوفر بين يدي..

الحمدالله رب العاليمن.. صح كل واحد لازم يمد رجوله على قد لحافه.. الا معاشه 250 والا معاشه 800 في النهاية راح يصرفه.. بس تفرق راح يصرفه على شنو.. اكيد لو معاشي 250 مابروح اصرف 50% منه على وجبات جاهزة مثلا.. لازم نعرف كل فلس وين راح نصرفه قبل لا ينزل المعاش عشان بعدين لانقعد نصيح

موفق و الله يفتحها عليك

وشحادك تاخدليك سيارة سيارة قرضها 300دينار؟

هذي المشكلة
ناس دايما يطالعون فوق فوق بدون حساب للمستقبل
القرض حلو اول ما تستلمه و مع كم قسط تذوق المر و تندم على اشياء كنت في غنى عنها

عقد نفسية

عدم القناعة و حب الظهور و الفشار

كلمة الترف قوية شوي
لكن أقدر أقول ما يعرف يتصرف
أقدر أقعد ويه زملائي في العمل في نفس الوقت أصرف على قدي ولا أنحرج من صرفي وبجذي هم يتعودون على أسلوبي وأنا أتعود على أسلوبهم

والله على هالسيرة شفنا العجب , ناس معاشه راهي , بالصدفة لو ياكل كأنه فقير وناس يلبس لباس محترم وياكل احسن الاكل ويطلع يمين ويسار وهو على قده . بس احنا لو فكرنا شوي ففيه اشياء فعلا تكلفنا بلا معنى , منها مطاعم البريكفاست المنتشرة , يعني صحن بيض ب800 فلس عليه بيضتين عيون , صحن قشطة ب700 فول او كبدة دينار وياحسابة احسبي , 5 دنانير ريوق وهو يقدر بدينار واحد ياكل احسن منه

للاسف من اللي يفهم كلامك
التقليد الاعمى زايد

باين عليك تتريق عند قهوة حاجي بالمنامة..جرب مادوز او هيل وحليب وشوف الاسعار

الواحد مايمديه يعيش برفاهيه وترف .. حتى لو مد رجوله ع قد لحافه معاش 250 وش يسوي هو لمصروف البيت.. لمصاريف المدرسه .. وغيره .. اذا احنا تحملنا اطفالنا يشوفون غيرهم يبون نفسهم وش عرفهم ان المعاش نص الشهر مخلص حتى لو ماشرينا من المطاعم او ما طلعنا اسواق لكن الحمدلله ع كل حال

شلون حكمتوا انها اسراف ليش مو الوجبة تمادوا اصحاب التجارة في سعرها - لمته الواحد يحرم نفسه من اساسيات الحياة - جزء من تعديل المزاج و الحالة النفسية و اكرام النفس بعد جهد - لحظة ممتعة في التذوق بس صار كلشي غير محسوب في سعرة و بخاصة المشاريع البحرينية اسعارها تقارب الوجبات 5 نجوم - لا دراسة ولا علم في التسعير و التسويق - و الشعب منطم على حقوقة لان غرفة التجارة و المواصفات و التدقيق نايمه

ادا التاجر رفع السعر و ما كان يناسبني ادور البديل المناسب عشان اعيش حسب امكانياتي
في اشياء واجد نقدر نتركها و مي ضرورية

هو الراتب ما يسوي شي صح ومااختلفنا وبس اني اشوف واجد بنات يقولون ما عندنا فلوس ومفلسين وهم بشكل شبه يومي في المطاعم حق الريوق او الغدا او العشا وغير السفرات السنوية لتركيا وتايلند وبعدين يقولون ما عندهم فلوس ومفلسين ومغزى كلامي الرواتب متدنية في البحرين وبس ما ندفن راسنا في التراب ونتجاهل ان اغلب البحرينيين ما يعرفون يدخرون وهم كل يوم بالمطاعم والسينما والمجمعات

من جديه ما يتطورون و لا يقدرون يملكون بيوت
اي ازمة مالية تهدم كل شي

لا تعززون كلام اعضاء مجلس الشورى في إسراف المواطنين الفقره ،، 250 دينار بالاساس ما تسوي شي ،، ركزوا على اللي عندهم فلوس ويبذرونها في اشياء تافهه وما ينفقونها في امور خيريه المجتمع

يعني ادا ما ذكروا بعض المشاكل بترتفع الرواتب مثلا؟؟

وش علينا من اللي عندهم .. هذا رزقهم من الله مو من عندك
عدل وضعك و عن الحسد

شدعوى الوجبه بالبيت مو مكلفه .. الاغذيه اسعارها الحين غاليه مو مثل التسعينات

فشار بس حبيبي مد ارجولك عل قد الحافك وبتعيش

صح مايخلون محل وصيحون بلويل وثبور. اصرف على قدك لاتلبس ثوب اطول منك اطيحك. البس ثوب على قدك.

الحمدالله على كل حال الصحه والعافية كنز لا تعوض بثمن

طبخ البيت يعني توفير
دجاجة كلملة مع الرز و السلطة تكلف اقل من 2 دينار
و من المطعم تكلف 5 دنانير فقط
الفرق انه اكل البيت يكون بنص السعر و اقل

لزائر 88
اتفق معك من تجربتي الشخصية اكل البيت اوفر دايما و نظيف و صحي لان نستخدم المواد الطازجة و الصحية

صدقت الى اتجوفه فالسناب والانستقرام وغيرة تتعجب من الى يصيحيون ماعدنه وماعدنه وهمه من مطعم لي مطعم وسفرات وروحات وجيات

يمكن يحصلون مساعدات
ناس واجد عايشين على ظهور الاب او الزوجة

صدقت تشوف العجايب في هالديرة!!!

المشكله مو في الاكل المترف
المشكله تكمن في غلاء الاسعار، والبترول والمصاريف الاخرى
الراتب صار مايوصل حتى لنصف الشهر
الله المستعان

يبين تفهم بالعكس
يقولون لك وجبة ب 4 دنانير
يعني غالية يالحبيب

وجبة بأربعة دينار كل يوم !!
حتى أبو راتب أبو خمسة آلاف ما يسويها

وش تقول للتقليد الاعمى و الفشار
لا و في ناس يفوشر في الشغل يسوي روحه ما يحتاج و من يوصل البيت يروح لابوه و امه يطلب سلف اللي ابد ما يرجع لهم
حتى الاب و الام في سن كبير و ما يقدرون يرتاحون

بصراحة انا واحد عايش ترف مابعده ترف راتبي 500 دينار ادفع لقرض السيارة 300 دينار ولايجار الشقة 200 دينار بس المشكلة مو هني المشكلة الكبرى اني ابذر فلوسي على كماليات تافهة مثلا كل يوم المغرب لازم اشرب شاي كرك بربية .. شفتون ترف وتبذير اكثر من جذي!
مع تحياتي.. مواطن مطحون

انت ماعندك مشكلة لأنك مدبّر روحك

وش حادك على سيارة ب 300 دينار فسطها؟؟؟
الشقة نعرف اجارات هالايام غالية و الكل دايخ
300 حق سيارة عاد!!!!

قال تعالى وكلوا واشربوا ولا تسرفوا

قرآن كريم

لا صراحة عندكم حق البحريني واجد مترف ... المفروض نجيب لينا موظفين من سوسرا يقننون عملية صرف النقود لكل مواطن سوسري واحد ..ههه .

عيب والله راتب لا يسد رمق صاحبه هههههه هذا حال البحريني .

مسكين يالبحريني تتكلم عن الترف وتعني وجبات لبطنك فقط هذا ترف او مستلزمات خاصة ههههههه ههههههه .

يعني ريوق ب 4 دنانير مو ترف؟؟؟
سندويش جبن و كرك ب 300 فلس
يعني كلش ما في فررررق!!!!

هذا يختصر حال معظم البحرينيين! معاشه علقده ويودي عياله مدارس خاصة وتلفون غالي اخر موظيل وسيارة كشخة جديدة اقساط عقب يقول ماعندي

اكيد ما عنده
تقليد الناس اللي مستواهم المادي فوق يخليك تطر من الكل

شريت وجبة او ماشريت الراتب منتهي منتهي . هناك القروض والطلبات الأخرى هي من تقضي على الراتب , صحيح البعض يدلع نفسة شوي لامشكلة في ذلك لكن كم سعر الوجبات التي تقضي على الراتب؟

شاورما 2 + 1 عصير = 1.500 فلس × 4 اشخاص
الاب و الام و 2 عيال في اليوم = 6 دنانير × 30 يوم = 180 دينار فقط للعشاء
وين الريوق و الغداء و و و
مد رجولك على قد لحافك
مرة في الاسبوع من برة زين للتغيير بس ما تصبر عادة
ختى لو راتبي 1000 ما اقدر اصرف جديه

هي المسألة سالفة غيرة أكثر الأحيان، شلون هالموظفين ياكلون ما لذ وطاب من وجبات وأنا لا ،، من جذي ما يصير مختلف عنهم ويسوي مثلهم

نعم نعم
حالي من حالهم محد احسن من احد هههههه
بس راتب كبير يختلف عن راتب صغير
على قد لحافك مد ريلك

إشعاد،،،

عدل شغله ، آنه أعمل نفس الشيء أشتري لي أفضل الوجبات والأكلات ولا أروح أشتري لي سندويتش جبود مثلا أو فلافل علشان أنه رخيص وهو لا صحي ولاشيء ناهيك إنه متروس درام دهن !! أو صحن برياني اب700 فلس من مطاعم الآسيويين الوصخه.

علم المرة على الطبخ بالبيت بتوفر قيمة الوجبة + تضمن النظافة ما تعرف تطبخ؟ خلها تتعلم و تحاول ؟ ما عندها وقت نظمو وقتكم بحيث حتى لو تجهز الوجبة من الليل و يبقى تسخين عليك لا غير ؟ لكن الاتكالية و الاعتمادية على هالمطاعم هي اللي وصلت الناس على هالشي ؟ امهاتنا قبل بنتحجا عن اللي يشتغلون بوظايف عندهم تنظيم وقت بين الشغل و البيت و ترجع تنظيف و طبخ و تجهيز الجهال و تدريس و غيره ؟ هالزمن كل على التلفونات و كل كلمة و الثانية تعبانة و نفس الشي الرجال زمن الاتكالية

المرة تقول تحب الراحة ما تبي تساهم في مشوار الحياة
تبي منك البيت و السيارة و التلفون و الهدايا و السفر كأنك بنك مو موظف معدوم و هي اتفاخر وي ربعها
خلها على الله
أستر على ما واجهت

والله المعاش ما فيه بركة! عايشين عالبيض والطماط وما نوصل نص الشهر الا مخابينا خالية!