عندي صديقة من سنين عمري علاقة صداقة 15 سنه لما تزوجت بدت عليها الغيره وهي أيضا تزوجت قبلي بالعكس خدمتها من عيوني بعدين انا من تزوجت واعتبرها مثل اختي يوم عن يوم تحرصني على زوجي وانا صرت دوامه مشاكل مع زوجي لدرجة قالت لي بتشتري لي حبوب منع الحمل عشان اشربه عشان ما أجيب عيال ورا بعض الحمدلله على كل حال وبعدها عرفت مصلحتي وابتعدت عنها ... وكل يوم اطرش لي مسجات منها ومنها المثير من الجدل وفيها مسجات تقط حجي على زوجي ..قطعت علاقتي معاها الحمدلله اشكر ربي الحمدلله حياتي مستقره وحسبي الله عليها

بالخسبة للسوسة
ليش تعطون روحكم مجال اعوار الراس
اني صار لي سنه ماطب بيت عمي ولافكر اتواصل وياهم
بعد عن الشر وغني ليه

مو دائما اذا تبتعدين تخف المشاكل ... أوقات تزيد ... اني ابتعدت عن بيت عمي حتى افتك من مشاكلهم بس صار عدهم مجال انهم يألفون قصص عليي و يحرضون ولدهم اكثر من قبل

الواتس آب - صاير وايد مشاكل تجينا من هل البرامج وبس الوحدة تكتب كلمة عادية تقوم القيامة عليها وعسى ما تنزل صورة في السناب جات صارت الغيرة والحقد - آنا أتمنى من الناس مو كل شي تردين عليه ، حاولي تجاهلين، التجهال فن راقي للعقول الراقية

مازال هناك هالنوعية من البشر سواء في البيت او الشغل او حتى الجيران بس طبعا الأساليب اختلفت باختلاف الزمان و المكان و مع التطور الحاصل في المجتمع ... بس في النهاية سبحانه ما يتركهم يتمادون في طغيانهم ... بالعكس يوضع حد اليهم ... و ياما ناس آذوا بالفتنة و ربنا انتقم منهم لأنه يمهل و لا يهمل

الحين تتواجد هذه الأنواع من السوس, في الدوامات وخصوصا في المدارس ومدارس البنات خاصتا. وتتواجد في الواتس أب وخصوصا في القروبات. الله يحمينه ويحميكم منهم

يجونك ناس في الدوام يسوون روحهم انهم خايفين ربهم في كل صغيرة و كبيرة بس اذا دخلوا غرفة المدير ينسوون الاسلام بكبره ... بس شغلتهم الفتن على اللي وياهم في الشغل و تأليف القصص حتى يضلون هم المقربين من الادارة ... هذيلين لازم ينوضع ليهم حد ... بس احنا بطبيعتنا نتجنبهم حتى ما يلدغونا اكثر و هذا اللي مقوي شوكتهم

ما انقرضت إلا زادت وتطورت
في العمل كل شخص يحفر للثاني
وفي بيوت العوايل هم نفس الشي نسوان الحمي والحموات لازم تصدر منهم هالمضايقات

اي موجود بالذات وتكثر يين نسوان الحميي الي عايشين بنفس البيت

الحموات سوسات من تحت إلى تحت حتى لو العمه زينه يغيرونها على مرة الولد يغارون من مرة اﻷخو خصوصا لين جافوا أخوهم سمن على عسل مع زوجته لكن الي يسون جدي لازم يسون ليهم يعني حياتهم دمار إيه أزواجهم الدنيا دواره

حمدت ربي ماعندي حموات طلعت لي عمه تغار منى وتحرض زوجي علي ياما صارت مشاكل حتى مد أيده علي بسببه مأ اقول إلا الدنيا دوارة والله ياخد حقي منه وينه من عذاب ربي

الحين صارو الرجال سوسه بعد مو بس النسوان ويسوون فتن !!!

السوسة موجودة وواضحة

مفروض يسمونها الاخطبوط مو السوسة العمية - لان لها في كل بيت و عائلة و فريج اذن و حلج - مثل مسامات الاخطبوط بالضبط

نعم موجودة في أحدى الصحف الفرق الأول بدون راتب والآن براتب ودعم وهبات .

الشعب ثقافته سماعية و يحب القيل و القال و الكلام الفاضي ... السوسة العمية جزء من هذا المجتمع، حب الغيبة و النميمة و التدخل في شؤون الغير ثقافة أصيلة في هذا المجتمع.

مرت ابوي الماكره!سوسه عميه!اتسوي ر وحها صديقة خواتي لكن من صوب ثاني من ورى لورى وتقعد اتثير الفتنة والمشاكل بين خواتي اليتامى وازواجهم واهل ازواجهم! ويش هالحسد! وخواتي على نياتهم معاها ويحسبونها ابحسبة امهم! لكن هالمره ما تخجل وحتى اتوصل لحد المساس بالشرف! اتكلم اهل زوج اختي انه يهاوشون اختي وبعدين لما اتصير مشاكل لاختي اتجي مرت ابوي واتسوي روحها بطلة وانها انقذت الوضع وهدئت الامور وانقذت اختي من مشاكلها مع اهل زوجها!كيد وحسد ومكر! وخواتي البريئات يقولون انا غلطان وما يكلموني ويقولون عني مجنون!

لأنهم ميانين
يجدبونك ويصدقون مرة ابوهم العميه السوسه

المجنون الي يصدق مرت ابوه ويترك اخوانه وخواته

صحيح لو شنو يصير مرت الابو مستحيل اتكون بمثابة الام والاقرب للأبناء من أخوهم وعضيدهم ... اسمح ليي مجانين وسفهاء خواتك

أصلا التواصل بين الناس الحين صار كلش محدود فشيء طبيعي تنكمش عادة الفتنة والسوسة العمية

السوسات ما انقرضو
تلاقي وحدة في البيت مهمتها مراقبة و التشويش على اصحاب البيت
خبركم الحين لبيوت متكدسة فيها بالخمس او ست عوائل،فما يحتاج تطلع
تعيث الارض فسادا في مكانها

ليس السوسه فقط

سابقا فعلا السوسه لوحدها موجوده ولاكن الان جميعنا سووس رجال ونساء الرجال شغالون بين الاصدقاء في تفرقتهم وخلق المشاكل بينهم والنساء ايضا شغالون على صديقاتهم وهاذا ايضا موجود في البيوت والعوائل لهاذا مجتمعنا الحالي يسمى سووس لا يرحمون بعض في الفتن والمشاكل ونقل معلومات للاخرين حقدا وكراهيه بعد ان كان صاحب هاذهي المعلومات صديقا ولاكن بسبب مشكله معاه يقوم بالانتقام منه لنقل كل المعلومات الى الاخرين

مع الاسف في وقتنا الحالي تحولت المرأة السوسه الى رجل سوسه ينشر الفتنة

ياا كثرهم

لا زالوا موجودين لكن بأساليب مختلفة .. ما إن يدور كلام بين إثنين إلا وانتشر الموضوع بسرعة البرق لمن حضر ولمن لم يحضر المجلس والسبب وسائل التواصل الحديثة .. والهدف من كل هذا الغيرة والنفوس المريضة ..

أتفق معك ..موجودين بأساليب مختلفه ..عندنا وحده يكفينا الله شرها ..من تجي البيت الأول تقلبه فوق تحت ..الحين الكل يعرفها ويعطيها الأذون الصمخة

اللهم ابعدنا عن اصحاب الفتن ماظهر منها وما بطن
وحسبي الله ونعم الوكيل الف مره عليهم
والدنيا تدور
في ولادهم لان تربيتهم

موجودة ولكن تطورت حيث انتقلت الى وسائل التواصل الاجتماعي.
الـ whatsapp
وتوه من يومين تقريباً شخص فاشل سوى برودكاست ضد طليقته وكتب عنها ما لا يقوله اللسان
وتوجهنا لرفع دعوه عليه في مركز الخميس للشرطه
وبكل فخر يقول ظهري قوي ومن عندكم يحميكم
ونحن نقول له نحن واثقون ببنتنا

الله المستعان
السوسه موجوده بشكل متطور ومتدرب
تتناقله من الام للبنت وهكذا

وتحصلها ميته من عمرها بس تحسد وتفتن
وتاخذ اللقمه من افواه الاخرين
المشكله دلين الكل يسكت عنهم لو ينحط لهم حد
عرفوا الله حق
واكثرهم حسودين حقودين ومشعوذين

اي و الله
ويش اللي زايد جرأتهم غير انه الكل يخاف منهم و ساكت

يا كثرهم هالأيام !! تخريب بيوت،، وتفريق بين القلوب !! ،، يا ما سمعنا ويا ما شفنا ،، لكن الدنيا دوارة ..

لا والله موجودة وللاسف من اقرب الاقرباء في العيلة .. شغلتها تطلع كلام هذا مخابرات وهذا ابوبنات وهذا راح وهذا جا ياخي مجتمعنا يلوع الجبد

بصراحة شدني العنوان اني تزوجت من منطقة بعيدة عن بيتنا وكانت ام الزوج ما تتكلم قدامي ولا تسولف واني ما اختلط وياهم وايد واحاول اني افهم مجتمعهم ومرت الايام عادي والشمس مكانها والدنيا عادي الا في يوم من الايام رحت درست في معهد وكانت معاي وحدة جارة بيت زوجي والله والله يشهد قصص تقولهم لصف قدامي
مدري من وين بلاويها طلع تخبر ديرتها وجيرانها واني لين أنزل تحت بيت عمي اسمع الجن ولا همسة منهم
وتطلقنا

خيو مافهمت قصتش ممكن اتعيدينها

ويشو اني بعد مافهمت

اني بعد
لي فهمته أن هدي لي وياش بالمعهد تألف قصص عليش
الله يراويها

المشكلة ليست في السوسة العمية وإنما فينا نحن، فنحن من نعطي أسرارنا لكل من هب ودب، خصوصاً الأسرار الزوجية التي يجب أن تكون بين الزوج وزوجته فقط بغض النظر عن قرب الأهل أو الأصدقاء، فمثل هذه العلاقات يجب أن تكون خصوصية حتى لا يستغل أحد الثغرات التي تنوجد ببوحنا بأسرارنا لتستخدمها السوسة لتفرقتنا، فالسبب نحن من نعطي معلومات، حتى الأم والأب ليس من العقوق أن لا تخبرهم عن أسرارك الزوجية، فأنتم أيها السادة الذين فضحتم أنفسكم وهؤلاء تصرفوا بما نقلتموه لمسامعهم، أنتم ونحن المخطئون، والله أعلم. ف أ س

فعلا في أمور خاصة ما لازم احد يعرف عنها ... و لازم الشخص يعرف شخصية اللي حواليه ... اذا اختش غيورة و تدرين ان نفسيتها تتعب اذا احد صار أحسن منها في شي مو لازم كل شي تخبرينها ... امش اذا من النوع اللي ما تكتم اسرار و اذا صار ليش شي لازم تروح تنشره تجنبي تخبرينها ... ابوش اذا حاط نفسه في مقارنة مع زوجش لا تخبرينه شي و الأمثلة كثيرة

موجودة وبشكا اخبث من قبل مع الاسف

الحين ما احد يدخل على أحد الحين تطورت وسائل النميمة والغيبة وتخريب البيوت البركة في وسائل التواصل الحديثة

نعم لا تزال موجوده ، و بتقنيات عاليه ، كالوتسب و غيرها من هذهه الأمور

موجودة ياكثرهم في عايلتنا

صح عايلتكم انتون عاد بزيادة
صايرين ضربة مثل
========
الله يهديكم احد يقول جدي عن عائلتهم ؟

ليش ماحد يقول جديه عن عايلتهم ؟؟ اذا اتشوف كثرانين السوسة العمية عاادي

اكيد

السوسه العميه صارت بعد في الأشغال مو بس تتنقل في لبيوت

يا كثرهم ها الايام في قروبات النسوان واهما يقطعون ارزاق الناس

اكثر من يسبب الفتن والمشاكل هم الاهل، ولا ننسى دور رفقاء السوء وبرامج التواصل الاجتماعي. لكن علينا ان نميز بين الصالح والطالح ولا ننساق للفتن

لازالت موجودة ولكن في التواصل الاجتماعي الذكي او الغبي اذا أمكن ????

السوسة موجودة تنشر سمومها من بيت لبيت بس الحين تستخدم الواتس آب و السناب
المشكلة ان في ناس تشجع السوسة على الاستمرار بس علشان الفتن و الضحك و الطنازة ماخذين الدنيا لعبة من غير حيا و لا مستحى

الا موجوده وبقوه بعد..الله يبعدهم عنا

موجودة وبقوة

في أماكن العمل بين الرجال، أعني المفتنين هم في جلهم أشباه الرجال

الناس حاليا ليسوا بحاجة الى سوسة لتفضحهم. فقد فضحوا انفسهم ولم يستروا عليها فقد أصبحت حياتهم مكشوفة امام الآخرين ولم يعودو يستعينون بالكتمان لقضاء حوائجهم. بعضهم يتباهى بعرض تفاصيل حياته على وسائل الاتصالات وآخرين تأثروا بأنماط الحياة من بيئات غريبة عن عاداتنا وتقاليدنا.

الى الآن هي موجودة ولكنها تطورت وبدل أن تتنقل في البيوت أصبحت تتنقل في محادثات الواتساب والقروبات وفي الهاتف

موجوده بس البارحه انا سمعنها

يا كثر السوسات ولا تجيك غيوره وحاقده مثل حماتي ماتقدر تصير زينه تتقلب جنها حمام قلاب الحمدالله ربي ????????

نفس الحال اني حماتي بغت تفرق بيني وبين زوجي حسبي الله ونعم الوكيل يوم الله بان الحق ردينا الى بعض....الحين هالحماه بعدت العمه والعم وبقيت بيت عمي عني وخلتهم ما يوصلوني ما ابري اليها ذمه

اني امه فرقت بينا واخذت التقاعد مال زوجها المتوفي وزوجته وعيالي ربتهم عندها بلوشي ياختي رايحين لشماته

المحامية/ اضم صوتي لش حسبي الله و نعم الوكيل في الحموات الي يغارون من مرت اخوهم و يغارون لين جافو اخوهم متهني وهم لا كله يفكرونه خروف ...

عمتي ام زوجي كانت كلش حليوة ويايي بس بناتها شوي شوي بدأوا يحرضونها عليي و اي تصرف اتصرفه يفسرونه ليها بشكل مغاير للي اقصده و حطوا في رأسها اني حاطة العداوة ليها ... اللحين هي ما تشتهيني و اني صرت اتجنبها حتى ما أسوي لروحي مشاكل مع ولدها اللي على اقل شي بتشتكي عنده و هو سيدة يسحبني حتى يرميني في الشارع

الله يعينش .. الله ينتقم من السوسة العمية الكبيرة .. لو موفرة لينا بيت اسكان اول مانرتبط جان خفت المشاكل .. فوق العشرين سنة ننجبر نسكن ويا ناس أكيد بتصير مشاكل