الله يخلف علي مهما اسوي وافعل وآخر دلع وطلعات ع البحر الفجريه بـذمتكم شفتم زوج يودي زوجته ع الساعه ٣ الفجر البحر والقهر يلا نزلنا ترد خلاص شبعت رجعني الشقة يكفي شمية ريحت البحر مادري ادش غوص في بطن حوت اطلع مصارين دجاج من قاع البحر
وكل هذا اغسل اطبخ أنظف وبالصور شاهدة ع كلامي واترس الثلاجه وكماليات البيت أوفرها وربي مهملة بناتي وكله مغص وامساك وجروح
وآخرتها تتهمني اني ما اجيب اغراض ومنقص عليهم بس الحمد لله اني مصور كل شي
اثاريه من اهل الكهوف متعوده ع اسلوب الوحوش والصراخ والهيلمه مو مالت دلع

الحمد الله توني مسوي وياها شعيرية ومسوي جيكين شربت واحد فيمتو و واحد برتقال
وهي تسوي الفطور ربيان تحت العيش
حياكم على الفطور

عن نفسي انا اساهدها غسيل المواعين والعصير علي ماخليها تلمس المواعين واخم البيت معاها وكل شي اساعدها فيه بس لثياب ما اعمل فيهم شي

ماحب المرأة الي تعامل نفسها كأنها خلقت فقط لتقابل المطبخ والتنظيف والتربيه
وتقول بأن الرجل مكانه مو الطبخ والتنظيف ولا لمساعده
انزين والأمام علي سلام الله عليه حير مثال
هذلين النوعيه من النساء فعلا ناقصات عقل

الحمدلله رب العالمين ..
زوجي يساعدني ويطبخ ويغسل ويكوي ويخم وينظف ويبدل حفاظات الجهال ويساعدزي ومايقصر عليي
رغم انه يرجع من الشغل تعبان اله انه يهوى مساعدتي
حتى اقوله ساعات خله ويرفض يقول انتي في غيابي تتعبين تشتغلين دبل عني الجهال صغار كلش و ادري يتعبونش ف لازم اريحش لانش تتعبين عشانا احنا
مع ان اني اطبخ وانظف بس حلوةالمساعده الزوجيه
الأمام علي سلام الله عليه خير مثال للزوج المثالي
سلام الله عليك يابو الحسنين
احب الزوج الي يقدر زوجته ومايعاملها كخادمه له

بالنسبه لي ساكنه في بيت عمي.... يعني اني وزوجي رجول على رجول والخدامات يطبخون الفطور و وقت الفطور العائلة تتجمع والي يحب يجيب اطباق من بيته يجيب وما احلاها من لمة

حياتي يبي ينام نوم العوافي من عيوني اطبخ له

ماعندي مشكلة اطبخ وهو نايم
في بيت ابويي كنت انام وامي تطبخ!

ام زينب
انا للاسف ماعندي مطبخ يكون فطورنا ويه بيت عمي فاضطر انزل من الظهر لاذان المغرب عاد عجبني ما عجبني الفطور هذا الموجود وهو الولد الوحيد فما يسوي شي حده يشتري خبز وبعد مو كل يوم

انا ام و موظفه ارجع من الدوام 2 دايركت ع المطبخ للاذان وهو يوصل معاي لكن هو ينام وتالي ع الفطور بس يتحلطم بس هاي الفطور? ليش ما سويتين هالشي? الاكل ماصخ? في البدايه كنت اسكت واطوف واقول ماعليه بس مصخها قمت اقول ليه ترى مو من حقك تتامر علي ولا واجب علي هالشي كل وانت ساكت

انا بصراحه واحد في الدوام ارجع ٢ الظهر، اي مطبخ بعد، لو تقول لي قوم ساعدني كسرت البيت باللي فيه، هالقاصر بعد شغل مكتب وشغل بيت. وما عندي مشكله لو بتهددني انها ما بتطبخ ، بيت الوالده موجود والمطاعم مشرعه ابوابها.

الله يساعد زوجتك حقيقتن
اكيد كاتبه عنك هني في تعليقات هههههه

اني لو قلت ليه جيب جيك. الشربت قال تعبان مالي مزاج خيابه

ينام ويقول لين اذن قعدوني ولين حطينه الفطور يتحجج هاي ماصخ وهاي حار وليش ما سويتون بلاليط و احنا نبي عصيده

ما في على الزوج البحراني دايما يساعدون زوجاتهم.
كثير من رجال البحارنة يجيدون الطبخ باحترافية و يساعدون في المطبخ بشكل كبير.

لا أريد منه أن يدخل المطبخ معي وانحرج اذا يحمل صحن
او اي شىء عني هذا مو مكانه مكان الزوجة
تبدع وتسوي كل شىء اذا كان ولا بد من مساعدته
جلوسه مع الأطفال يكفي ولا داعي لإتعاب الزوج .
انا احب ان أكون ملكة منزلي

يعني مسوية روحشش خدامه ومعودتنه على هشي ان مايهش ولاينش
النبي والاامام علي كانو يساعدون زوجاتهم ..
والنبي كان يحث الامام علي بالاعمال المنزليه
اشفق على جذي زوجات وجذي تفكير بان الزوجه خلقت للمطبخ و لشغل البيت وبس

لين صار عندي مكان نفس الناس بعدين لكل حادث حديث

نادرا جدا

ليش مو مكانه المطبخ الزوج يعني لا سمح الله لو الزوجة تمرض وعيالها صغار مايسوي لهم شيء بسيط لازم يدخل علشان وقت الحاجة .. ونعرف ازواج يطبخون ويغسلون والزوجة ماتشتغل خارج البيت التعاون مطلوب في كل الامور

انا متقاعد واحب اساعدها لكن هي ملكة المطبخ ومريحتني علي الآخر

اثنينا موظفين، نرجع من الدوام نتناوب على المطبخ والأولاد. ما فيها شي لو زوجي دخل المطبخ، مو احسن من الإمام علي هو

اني حاليا وية بيت عمي اطلع اساعد عمتي و زوجي ما يقصر بعد يساعدنا يشتري اغراض بس ان شاء الله لين صار عندي مكان بروحي ما بخليه يساعدني الا في غسال المواعين و يجود عني الجهال

انا ربت منزل ما اقبل يساعدني كفايا يطلع من الصبح يشتغل ليوفر لنا احتياجاتنا فمن حقه يرجع يرتاح مو يوقف فالمطبخ

نطق على لسانك روح القدس

لك الحمد .. في رمضان الكل يتعب .. الزوج يشتغل في الحر ويجي يرتاح والمره تنام وتقعد تستعد للطباخ وبعد اافطور الكل يتساعد
في النهايه كل واجد منا يقوم بشغله ????

انا اخدم زوجتي وعيالي مو فقط في شهر الله اساعدها طول السنه اغسل انظف اسبح ولادي احفظهم اسوي ليهم رضاعه حليب واطبخ احيانا واغسل النواعين صحيح طباخي ساعات خرطي بس ويش اسوي الطبخ للنسوان هم يعرفون الطبخ

انا زوجي متوفي بس الله يرحمة يمدح طباخي وكنت مريحته على الاخر ما اخليه يسوي شي بس يامر يدلل والحين عيالي يساعدوني

الرجل ليس مكانه المطبخ و اذا يحب يساعد فهذه مبادرة جميلة منه بالنسبة لي ممنوع الخادمة او الزوج يساعدني و المرأة العاملة لا يساعدها الوقت في الطبخ لهذا مع الاطباق الرئيسية تشتري المكملات من حلويات ...او مخبز ... و يكون الاختيار بيرفكت ..

يسهر بالليل ونوم للعصر ولا يدري من يسوي ومن يطبخ اذا بسوي شي وناقصني غرض اضطر اطلع اشتريه او ما اسوي لان مسحيل يقوم من نومه عشان يشتري

الحمدلله رب العالمين الله يعطينا الصحه والعافيه ونقوم بشغلنا على اكمل وجه والله لايحوجنا لا للزوج وللاولاد
وكل واحد وشيمته يبي يمد يده ويساعد جزاه الله خير
قال تعبان ويبي ينام نوم العوافي
واحنا الله يعينا ويعطينا الصحه والعافيه
وكل عام والكل بخير

الرجال يبقى رجال انا احس ثقيلة وعيب علي اخليه يلمس شي بالبيت واهو وي عليي ما يتامر ولا يطلب ولاشي ويعرف ان ماعندنا مطبخ واشقى بالشمس والحر بس علشان ااكله اهو وعياله لقمة هنية فهو يقدر هالشي واوقات يرفض اني اطبخ وهالسنة ان شاء الله بنكون بيت الوالد ويفداها الوالدة والوالد تعبي واروح فدوة لهم بس الله يقدرني على خدمتهم ويعطيهم الصحة والعافية واخدمهم طول العمر

مسكين بكبره مايرجع الا حزه الفطور من الشغل .. الله يخليه ويحفظه بس لو شافني تعبانه .. احتاج مساعده.. يغسل عنى مواعين اخر ليل من غير ما ادري .. اقعد بغسل الا مفاجاه المواعين مغسولين .. ❤

الطريق الى قلب الرجل معدته وزوجي على المزاج اذا عنده مزاج يطبخ ويغسل المواعين واذا ماله مزاج ارجول على ارجول هههههه

ههههههه عفر نفس زوجي

زوجي يحب يساعدني لكن اني ماارضه يساعدني..كفايه يرجع من الشغل تعبان..الله يخلي ليي

أنا صراحه خفت أقرئ الردود عن لا أشوف أسلوب اللعلعة والعصبية مال النسوان ويضايقني! أنا ما أتحمل قرائتهم مو بعد أسمع صوتهم!

من كثر مايعيب على طباخي سد نفسي عن الطبخ وعن التفنن والتطور في الطبخ
مسكينة اني اطبخ بتأني ومتعة. وبهارات اشكال واللوان وفي النهاية يعيب مايحب طباخي ابد ويش اسوي يوم اقول وين الليمون وين الفلفل يوم يقول تتطبخين بلا نفس وملل
احط في خاطري اذبح روحي بالمطبخ وحوسة وبالنهاية كلمة حلوة مافيه
مايفرح قلبي الا عيالى اذا اكلوا منه يسولفون رغم صغر سنهم يردون على ابوهم ان طباخ امنا لذيذ واحلى طباخ فديتهم جبدتي

الحمدلله زوجي من النوع اللي يساعد ارجع من الدوام يجود الجهال واني اريح شوي وادخل المطبخ وادا بغى يروح ينام يشغل لهم التلفزيون لان اثنينا نشتغل ويقدر وضعي
اكثر من يعور قلبي هو الوالدة .. احنا بناتها ما نحاول نكلف عليها وبالعكس نسوي الحاجه ونوديها .. اولادها اغلبهم ما يتفطرون في بيوتهم ونسوانهم تروح بيت اهلها او يشترون ويا ريت عندها شغاله.. العين اوسع لهم من البيت والله مو اعتراضنا على جيتهم او على اللقمه الا بياكلونها بس على هالمسكينه جان ساعدتنا الظروف نروح نساعدها او بتغافص بروحها

الزوج يرجع من الشغل تعبان من لصيام والحر ومن حقه ينام ويرتاح لكن عاد ارتحت طول عصريتك ساعد زوجتك بعد الفطور ولو بشي القليل تحسسها بأهتمامك وتقديرك بتعبها طول اليوم في المطبخ علشانك
مو تمش يدك وتطلع وتخلي الشغل على جافوخها
والسلام عليكم ...

احسن رد

الحمدلله زوجي ما يقصر بالتعاون والتفاهم والله يطول عمره الغالي الله يهدي الجميع
وإن شاء الله الله يعينا على الصيام والقيام
مبارك عليكم الشهر

ويش هلهرار من الظهر

بل لوووويه كلكم حاطين حطه على رجالكم نسيتون انه يشتغل ويتعب عشان منهو ؟؟من الصبح يطلع مايجي الا متى عشانج يالزوجه .. صدق نكورين نعمه .. اني مابي زوجي يساعدني بروحه يكسر خاطري برجعته من الشغل تعبان وشمس وصيام الله يساعدهم

خاطري أساعدها مسكينة تتعب في الشهر الفضيل خصوصا أني العصر فاضي ما أشتغل في رمضان العمل الفترة الصباحية فقط ، لكن مالي مزاج بسبب التدخين و الشيء الثاني تقول المطبخ مملكتها تحب تبدع فيه على مزاجها و تتفنن بدون مضايقة من أحد .

تلاقيها تتهاوش مع قوطي الصلصة

هههههههههههههههه عاد انت الي تنظف

أعوذ بالله من هالتخلف

صج ليه قالوا قاتل الله الجهل ايي والله شنو هالكلام يبى عايش في أي عصر انتة

يجي تعبان من الشغل بس ما يقصر بو يوسف. ولا يخليني محتاجة شي

ايي والله

شنقايلين رجل على رجل

اني امشي على مقوله ابنك على ماتربيه وزوجك على ماتعوديه ..
معودتنه انه يساعدني في شغل البيت ورمضان بعد ما يقصر اذا اختاجه يساعدني والاشياء بسيطه يعني يغسل جم صحن عشان لا يتجمعون وهو يبي يدلع بطنه يتحمل ههههههههه واذا اطباق شويه احاول اطبخ واغسل ماخليهم بس اذا في حاله طوارئ لازم يساعدني لانه اني بعد اشتغل ومو فاضيه بس حق طباخ هو شهر للعباده بعد ..
ورمضان كريم .. والله يبلغنا جميعا ❤️

اني زوجي يجي من الشغل تعبان وسيدة ينام ومازعجه اخليه لوقت الاذان اقعده واني اسوي الفطور بروحي ولا احب احد يساعدني ويربكني
وهو مسكين ياكل اي شي ومايتامر ولا يتحلطم ويشكرني على الاكل مجرد هالكلام الحليو ينسيني التعب
الله يخليه ليي ويحفظه

شهر رمضان صاير سباق طبخ..... كله بطر و خساير . المزعج في الأمر غسل المواعين . و الا حاله حال بقية الايام

الحمد لله احنه بيتنا ما في هالشي نسوي بس صالونة وقيمات وسلطة بس او بدل القيمات كباب او بلاليط وساعات نسوي خمس 6 سنبوسات احنه نقول لامي لا تسوين اكل واجد حرام يتم او ينقط وهي كل تبغي تطبخ وتخسر بس احنه ما نرضى حرام والله بيت جدي اوووو اكل بالهبل يعني او احد يجي حزة الحزة مع عائلته يحصلون اكل ما يخلى بس جدي مو زين الواحد يتفيسق بالنعمة

اني زوجي ما يساعدني اطبخ واشتغل بروحي ولا امبيه اجيب خدامات وصخين لا يعرفون يطبخون ولا ينظفون والشغل للمراه مو للرجال

طبع الرجل يحب طباخ زوجته فهو يستطلع مافي القدور حتى يهيى نفسه للأكل

زوجي في السجن.. طلعوه و بخليه يطبخ لي

الله يفرج عنه ان شاء الله

يطلعه الرحمن الرحيم

الله يفرج عنه وعن الجميع بحق الشهر الفضيل ويفطر معاكم ويلم شملكم يا رب

زوجتي شايلتني فوق راسهه وماتخليني المس شي .. بالعكس لما يصير عندي عزيمة او ضيوف او حق الماتم اهي تبادر وتطبخ وتبدع .. انه اطبخلي فقط يوم الجمعة لين اهي في بيت عمي

مباركم عليكم الشهر الكريم والحمد لله زوجتي تقول شغل البيت من جانب الزوجة وانت تشتغل من الصبح الى المغرب ارتاح والله يعطيك العافية

انا موفر ليها شغالة تشيل الشغل والطباخ وفوق هذا اشتري المقالي والاكلات المثلجة ما عليها الا تأشر بصبعها للشغالة وبس

خوش رجال. كثر الله من أمثالك

امبختها فيك

اعمال قليلة توفر وقت كثير و طاقة كبيرة للرجل - قطع الخس و افرم البصل و الثوم و البقدونس ب الة الفرم الالي - غسل الشوك و الملاعق و السكاكين - افرش غطاء المائدة - ضع العصائر في الثلاجة - اخلط العصائر مع السكرو لكن لا تقم باضافة السكر بنفسك

كل بيت لة طريقة في شهر الكريم بدون تعليق علي الزوجة او رب الاسرة ومبارك عليكم شهر رمضان

رجلي يساعدني مايقصر ساعات اطلب منه السلطة ويسويها وعقب الفطور يشيل الاغراض ويايي حتى ساعات اخلي المواعين ليوم ثاني ويغسلهم بس في طبع كرريييه ينرفزني من يشوفني اطبخ جا دخل وبطل القدور وويش طابخة وويش بتسوين بعد وحتى الكباتة يبطلهم مادري لويه اني فاطسة ومطبخنا نتفه وهو يدور ورايي سيده اطرده هههه الحمدلله افضل من غيره بمليون مرة ربي يحفظه لي ولاولادنا

بصراحة زوجش ...
ما باقي الا يغسل الثياب

الصلاة على النبي يغسل الثياب عني بعد
بس لويه محتر/ه؟

لا يختلف اثنان على ان زوجك ذو شخصيه ضعيفه بل و مهزوزه .. انا رجل و لم اسمع اثناء مجالستي للرجال ان هناك رجل يقوم بهذه الاعمال و هذه المواصفات الامن لا يملك قراره و يخاف من زوجته لغقدة ما في نفسه .. من الواحب ان تخجلي من ذكر هذا

يختلف 10 مو بس 2. الحين الرجال لو حط ايده وساعد مرته صارت شخصيته ضعيفة ومهزوزة !! وش هالحچي بعد؟
ورد عن أمير المؤمنين قال: دخل علينا رسول الله صلى الله عليه وسلم وفاطمة جالسة عند القدر، وأنا أنقي العدس، فقال: يا علي، اسمع مني، وما أقول إلا عن أمر ربي، ما من رجل يعين امرأته في بيتها إلا كان له بكل شعرة على بدنه عبادة سنة، صيام نهارها , وقيام ليلها، وأعطاه من الثواب مثل ما أعطى الصابرين وداود ويعقوب وعيسى. يا علي، من كان في خدمة العيال ولم يأنف كتب اسمه في ديوان الشهداء. للحديث بقية بس مافي مكان

إلا زوجها إنسان بمعنى كلمة الانسان وطبيعي وحنون
والحمدلله زوجي قريب لمواصفات زوجها.. واضيف عليها انه عندي رضيعة فإذا شاغلتني يكمل عني طبخ الوجبة..

مع احترامي الشديد
محد شخصيته ضعيفه ومهزوزة غيرك !!
الرجل اللي يساعد زوجته .. اللي يغسل واللي يقصص واللي واللي ..
رجل بمعنى الكلمه لأنه يساعد زوجته

الحين صارت شخصيته ضعيفة ومهزوزة ليش ان غسل عنها المواعين ولا سوى عنها السلطة يعني لازم هي تكرف وتجحت وتطبخ وتغسل وتسوي كلشي عشان تصير شخصيته قوية ومو مهزوزة صدق لين قالوا راحت رجال الي ترفع الدروازة وجتنا رجال المطنزة والعازة

اذا كان الرسول يساعد في شغل البيت

هههههه انا زوجتي ماتعرف اتسوي شي...وحايب ليه خدامه 1000 دينار ومعاشها 100 دينار....وبالنهاية كل يوم بيت ابوي اتفطر...أقول ليه طبخي اتقول ماعرفه ولا احب؟ والحل

الحين لانه زوجها يساعدها صار ضعيف شخصية ويخاف منها اش هالعبو معناة كلامك ان الرسول عليه افضل الصلاة والسلام لما كان يساعد زوجته بعد كان يخاف منها وما عنده رجوله استغفر الله ربي العظيم بالعكس حلو ان الريال يساعد زوجته في كل شي مو بس المطبخ انه الخين خدامتي راحت وزوجي يساعدني بغسيل المواعين يعني ما ضعيف شخصية بعد خوش خوش ما اقول الا مالت على رياييل تفكيرهم مصدي نفسك هذا اذا انت ريال اما اذا انت مرة فأقول خلي الغيرة والحسد ومطالع الناس عنج

مهزوزه ! محد شخصيته مهزوزه الا الي يتكلم بهالاسلوب ويسوي نفسه قدام ربعه انا الي ما اسوي شي بالبيت .. على اساس هذي الرجوله .. انت ذكر ولا تمت للرجوله بصله

حال زوجك كحال جارنا الذي يقوم بكل الاعمال المنزليه التي ذكرتيها بل حتى وصل لدرجة يطبخ عن زوجته فاصبح هو المراه و هي الرجل جالسه على كرسيها تتأمر عليه و هو كا الخادم المطيع حتى اصبح كا العلكه تلوكها السن الرجال فأضخى يخجل حتى من مجالستهم و اخذ يتوارى عن النظر في عيونهم

قريبا جدا سيصبح زوجك كا العلكه التي تلوكها السن رجال قريتكم او مدينتكم إن استمر على هذا الحال و تفاخرتي انتي بما يقوم به بين النساء و على صفحات الجرائد

عيب استحوا على ويوهكم شنو هالحچي اشدعوة بيصير علكة انتوا شيخصكم اهو راضي وحاب انه يكسب اجر بمساعدة زوجته ما اقول الا الحمد لله والشكر على اوادم حقودة وحسودة ولعينه مثلكم شنو ما تبون تشوفون احد مستانس ومرتاح. روح اقول روح الله يعين مرتك ويعين نفسك عليك

زاير 109. مو لازم يخبرونك اذا يساعدون زوجتهم. .هذا أمور خاصة. .
ومو غلط لين ساعد زوجته

..

من انتم؟؟
الرسول ص كان يساعد زوجاته و كذلك الامام علي كان يساعد الزهراء عليها السلام
هذا الزوج الذي يساعد زوجته و في نظركم رجل ناقص هو افضل منكم عند الله

لا ما يقصر أبو فطوم يساعدني عشان يكتب له الله في كل شعره أجر وحسنة مايقصر كلششش واعصابه اتكون كووووول وكل يعبد ويسبح الحمدلله على كل حال

أستغربت السؤال فسألت زوجتي من فينه يطبخ قالت أنت تطبخ وأنا قلت أنتين يعني حياتنا ماشية يوم أنا عشرة هي لو العكس وأحيانا من المطعم والامور ماشية خصوصا ان اثنينه نشتغل واثنينه نشتري واثنينه نتأمر واثنينه نربي واثنينه نهيم كل الفرق انها بدفتها وأنا بعقالي

عجيبني ردك هذا الحال الحين صايرن احنا النسوان حالنا حال الرياييل نشتغل ونصرف ونشتري بس الهياته مو من صوبي الحمد لله اذا طلعت عيالي لازم معاي ما احب اروح مكان بدونهم. الله يخليكم لبعض ويسعدكم ان شاء الله

الله يطول بعمر الوالد هو قدوتي. اذكره يساعد الوالدة من يوم كان في عشريناته، والحين يوم تقاعد هو الي يطبخ عنها وقليل تقرب المطبخ.

انه صراحه متقاعد واحب اساعد زوجتى فى البيت حتى قبل لا اتقاعد كنت اساعدها صراحة الزوجات يتعبون فى البيت .. والله يوفق الجميع وبارك ليكم بالشهر الكريم والله افرج عن شعب البحرين الطيب

حبيبي

يساعدني خلف جبدي في كلشي ...الله يخليه تاج راسي و يحفظه لي ابو عيالي

زوجي ما يتشرط أبدا ولا يساعدني في المطبخ وأني أصلاً أحس بالمتعة والسعادة وأني أطبخ وأخدم زوجي حبيبي وأولادي وكفاية لمتنا على السفرة تسوى الدنيا وما فيها .
الله لا يغير علينا .
الله يقدرني ويعطيني الصحة والعافية وأخدمه على طول من عيوني .

الله يعطيش الصحة والعافية ويخلي زوجش وعيالش وفعلاً اللمة عالوجبة تسوى الدنيا وما يعرف قيمتها الا فاقدها

هذه اللي اذا سوت بيضه مفيوحه منت عليي

شفيكم أمهر طباخين العالم هم الرجال
فبلا تفلسف
الحياة تعاون بين الزوجين في كل شي

لا انا صراحه اساعدها عقب ما تخلص طباخ اتفطر وما اخلي شي ينقط وبس في احسن من هذي المساعدههههه

اني اشتغل وهو يشتغل وصراحة نرجع اثنينا وننام ونقعد المغرب نتفطر ويه بيت عمي وبعدين غسال المواعين عليي اني .. لكن في شغل البيت اذا ليه زاغر حط ايده ما ليه زاغر وينك يا الدرب .

اني زوجي ولله الحمد والمنة يساعدني بقدر المستطاع. أحيانا يقلي عني خصوصا لين قام الدهن يطفر يخاف عليي. واني اغسل مواعين الطباخ وهو يغسل مواعين السفرة بعد الاكل. ويغسل الخضراوات الله يطول بعمره وخليه لينا يارب

لو غيرنا المهام لزجين هل تعتقدون ان الزوجة بإمكانها ان تقتل الصرصور وتشيل الطابوق طبعا ما بتقدر على هالسوالف ابدا لكن الزوج يقدر يطبخ او يكنس ويغسل بالمعنى الاصح يقدر يقوم بالموكل اليه من مهام.ودمتم سالمين ومتباركين بالشهر الكريم

انا اله عندي ما تحب تطبخ و مرات تسوي فطور نتفطر في ٣ ايام و دائما تعبانه و شغل البيت متعب مافي راحه ...الخ هدره و هذا غير غسال المواعين دائما علي تقريبا بس ما اتكلم مع انه عددنا بسيط جدا في البيت

????????????????????

ويش عليك من النسوان مفنزرين الظهر ويقعدون من الظهر الى المغرب في المطبخ على هذا الكيكه او معكرونه
انا اقول خلهم في المطبخ ينجبون يبون يطلعون فيها

ههههههه

ضحكتني من الصبح الله يخليها ليك

اني رجلي ما يهد بيت ابوه لازم يروح كل يوم اني اطبخ لمنهو . اطلع من الشغل واروح بيت ابوي واساعد امي واذا خاطرنا في شي نطبخه من حلويات وخفايف اشياء جدي سريعه ما في وقت من بعد الدوام وبس والله . السحور يا يجي حده فل ما يبي شي او حليب وبخصم ا و كورنفلكس وبس

الشغل يأخذ إجازة بعد مو يساعد
حده ع هالتلفون والتلفزيون والهياتة
يا أخي التفت لي اشوي

زوجي يحب يطبخ!!
وما يعجبه الا طباخه
الصراحة اتنرفز اذا يدش المطبخ
ما احب أحد وياي ويقاطعني
وسوي جدي ولا تسوين جدي
اتمنى السنة يقعد برى المطبخ ههههههه

شهر رمضان شهر الطاعة والتقرب لله، شهر التوبة والمغفرة، شهر هو عند الله من أفضل الشهور.. أيامه أفضل الأيام ولياليه أفضل الليال وساعاته أفضل الساعات.. شهر نحن مدعون فيه إلى رحمة الله والمفروض نغير فيه من أنفسنا وواقعنا ونفتح فيه صفحة جديدة مع رب العالمين ونستغل هذه النفحات الربانية ونهتم فيه بعبادتنا وعلاقتنا مع ربنا!
فيا ليت نتعامل مع بطونا بعقلانية وبوسطية واعتدال ونركز على الأمور الروحية والتعبوية في هذا الشهر الفضيل والفخر بالقرب من المولى والقرآن والتفقه في الدين وأعمال البر لا حجم المائدة

الحمدلله
مائدتنا في شهر رمضان لا تفرق عن الايام العادية
طبق رئيسي وقد يكون هناك طبق جانبي
ونظرا للصيام وانتظام اوقات الاكل اشعر براحة في جهازي الهضمي

طول السنة يساعدني

صراحة ما أنكر انه يساعدني طول السنة في المطبخ وخصوصا اذا اني حامل، ارجع من الدوام تعبانة وهو اللي يطبخ الغدا، ومريحني في شهر رمضان ما يتشرط ابدا في الأكل حدنا صالونة اللحم ثلاثون يوما اللي تلوع جبدي وأضل شهر عقب رمضان ما أشتهي صالونة لحم، وإذا بطبخ شي زيادة حده طبق واحد ومو كل يوم، لكن خلني ساكتة عن الأمور الثانية احسن ههههه لا يوجد زوج كامل

لا رجول على رجول ولا شي كله يدور ويحوم طالع داخل على كبر البيت -

اعتاد ان يأكل اثناء شهر رمضان ما تطبخه عمته العجوز دون حياء او خجل لتجلس هي كا الملكه

أبدا ما أقدر أخلي رجول على رجول، زوجتي مو مخلتني في حالي، كل يوم طبخة، وكل وحدة أحلى من الثانية، وأنا آكل، إلين ماكبرت كرشي، وصار صعب أخلي رجول على رجول.
حسبي الله ونعم الوكيل،،،

أنا أطبخ أكثر منها في رمضان وغير رمضان وطباخي أحلى منها بعد والكل يشهد بمذاقه الطيب

شوي شوي علينى ..ياخوفي بس اكل ومرعة وقلة صنعه.... تبلع وتنخمد وبعدها هياته

شي طبيعي
الزوج الصائم يروح الشغل و الزوجه نايمه ما تقعد الا الظهر، فإذا رجع من الدوام وما نام ليه شي متى ينام؟ وخصوصا ان في رمضان معظمنا قاعدين لقرابة الفجر ... ومع هذا الواحد يحاول يساعد بقدر الاستطاعه
مبارك عليكم الشهر ونصيحه للصيام قللو من الاسراف والتبذير والتوزيع على البيوت بيقل جهد المرأه في المطبخ

والزوجة اللي تشتغل

و المرأة اللي تشتغل؟ تشتغل وترجع تدخل المطبخ تطبخ ما لذ وطاب!

هههه

أني أعجن القيمات والكباب وزوجي يقليه وشي ثاني يسوي عني السلطة والباقي كل شي عليي من تنظيف المطبخ وطباخ وغسال مواعين وووووو .
الحمدلله أهم شي إن ويانا لانه بدونه البيت ظلاااام .
الله يطول في عمره ومبارك عليكم الشهر

زوجي اذا مو مشغول يساعد، كفاية وجوده في البيت، و عمره ما تشرط وقال يبي طبخه معينه ، الي اسويه ياكله و يشكر بعد حتى لو الطبخه مي مضبوطه ما يعيب، و يساعدني عقب الفطور.. وحتى لو صار و ما سويت فطور يجيب فطور من برى.. الحمد لله رب العالمين، الله لا يحرمنا منه

أنا دائماً أطلب من زوجتي ما تطبخ وأترجاها ما تدخل المطبخ وأقول لها بجيب لج من المطعم كل اللي تبينه بس أبليز المطبخ لا والسبب لان تعدم المطبخ عدام وأقعد أنظف ساعتين قسم بالله طماط صلصل ويش يوصله السقف تقول طفر يوم بفتحه

ههههههههههههههه. برشر فيه قوطي الطماطه. تحصلها دايسه على ااقوطي وهي تفتحه

ههههه
ويليييي مو لهالدرجة عاد

ههههههه خليتني اصيح من الضحك

مال اول صلصل قواطي ترقو الشعب

يساعدني ؟؟
في رمضان يتحوّل زوجي الى محلل ، اول شي يطحن القيمات ويقيّم مستوى الطباخ كله بس بقيماته وحدة ، الزين أني اسكت عنه لأن بطاقة الصراف مالته عندي ومعطني راحتي في تدبير البيت ، ما ابغيه يساعدني بس لا يشيل مني بطاقته ، عقب الفطور والتحليل يبتسم ليي وابتسم ليه عبالي بيشكرني ، عودني ان ابتسامته يعني يبي يشرب قدو .

هههههه
يا عمري البحارنة يهبلون

افضل العبادات خدمة الزوج والمراة ما ليها في الدنيا الى زوجها وبيتها

الله يرحم أبويي كان دايم يقول مقولة ( حضورك عندي كما أنت غايب ) . خاتون

عيب على الرجل الدخول الى المطبخ لان ذلك يقلل من هيبتة صوب الاطفال والمجتمع .. والمراة مكانها الطبيعي في البيت والمطبخ تخدم زوجها واولادها ولا يصح لها الخروج من المنزل الا لظرورة

شكلش دارس في مدارس طالبان

شرعا مو واجب على الزوجة تخدمك هذا اكرام منها الواجب عليك انت من اخدم وشكرا

بلبل
عايش في اي زمن انت

الوووو داعش.. مضيعين واحد منكم اهني
تعالوا اخذوه

هههههههه عجبتي الووووو داعش

.. فلا يوجد شيء اسمه عيب هناك فقط حلال او حرام. وهيبة الرجل امام ابناءه وزوجته باحترامه لهم وبأخلاقه العالية

والله الوالد العزيز من قبل 30 سنة وهو يدخل المطبخ ويساعد الوالدة في كل شي وبالعكس رجال و سيد الرجاجيل ! وشكلك ما تعرف الدين، لان الزوجة مو واجب عليها الخدمة! تسويها من طيب خاطرها! المراة وصلت القمر وهذا الحجي يقول المرأة مكانها الطبخ والنفخ!

اجزم اما انك ملتحي و متدين لحد التزمت .. هذا هو اسلوب ما ذكرت من الفئات التي هذا هو منطقهم و ما درجوا عليه .. لذالك لا ارى حرجا إن كنت واحدا منهم

ايه والله داااااعش شكله امضيع

اني يدخلليي ويعفس المطبخ فوق تحت ويطلع يقول انا طبخت وعليش التغسيل انا ساعدتش...ولك انت هلكتني كل شي عفسته ووسخته

اصلا انا ماابي زوجتي تطبخ ولا تعور راسنا بالجنة بعدين كلها كم دينار و يجيك الاكل جاهز و في بارسلات نخلص اكل و لا غسيل صحون ولا اني سويت وإني طبخت ????
والشي الثاني انا اطبخ اكثر منها ????و اعلمها
حتى غسيل ثيابي ملابسها اتغسلهم الله يخلي المغسلة و فوق كل هذا تتحلطم شغل بيت و شغل بيت ???????????? و من تشوفني احوس في التلفون او قاعد تتحلطم
مطبخ الشقة في الشهر بتطبخ فيه مرتين لو ثلاث كل الوجبات

ياريت مايدخل المطبخ اريح لي ..كل ما جاع دخل يطبخ والاكل للرماي ????

ياريت يتطلب في الفطورانجان هانت ... الا يرجع من الشغل ايد وره و ايد قدام حته نتفة خبز مايجيب كله من ظهري الصبح في الشغل و عقب اشتري و اطبخ و العيال في ويايي في المطبخ ولين يقعد من نومه و ياكل يشبع بطنه و عقب سدحه لين الفجر مع التلفزيون ,,, الحمدالله مانبي الا السلامه من لسانه و ايده حتى في شهر الله مانسلم من شره

انا والدي متقاعد مايعرف يقعد رجول على رجول و يساعد امي في كل الشهور يجيب الودام ويوزعه ومايحب يشوف مكان متوصخ سيدة يشغل هالمكنسة وساعات يقعد يغسل الحمام واجد يتعب روحه وحتى لو عندنا خادمة يحب يشتغل في البيت وفي رمضان يسوي لينا الشربت الله يخليك لي يابابا ويقويك

لا ما يساعدني

أهم شي الزوج زين وياج ومؤدي واجباته الزوجية .. يعني الحين جت على المطبخ ؟ .. هاي لو تدلون المطبخ انتوا .. الله يخلي امهاتكم .

صح الله لسانك

من حلو طباخكم ازيد الرجاجيل تحصلهم في مطعم الرميحي

جايب لها خدامة بألف دينار ومعاش شهري ثمانين دينار وبعد أطب المطبخ مستحيل

من حقك توفر ليهه المساعده و توفر مستلزمات الفطور و عقب تمدد و ارتاح ماعليك قصور

..

مااحب احد يدخل المطبخ وانا اطبخ ...

الكلام إلا بلاش ههههه

خلها تطبخ هي اول تااااالي بساعدها

أبد

عمره ماعرف وين باب المطبخ بعد اقول الحمدلله أهم شي يلبي طلبات البيت وعياله مايقصر الله يطول بعمره

بعد نفس ما الرجل يكدح من اجل لقمة العيش ، الزوجة ايضاً عليها ان تصنع لهذا البطل ، الكادح على عياله فطوراً و سحوراً ، يخفف عنه العناء و التعب

الحين معظم الزوجات تشتغل و المفروض شغل البيت يكون فيه تعاون

ينام وانا اطبخ ويشرب شاي وانا اغسل مواعين
الله كريم

الحمدلله

الله يخليه زوجي مايسوي شي قبل الفطور لكن بعده يكرف المواعين ويقفض السفرة لان اني من بعد الفطور الطاقة زيرو

الحمد لله و الشكر
اني ما ابغيه يساعد ابغيه يقدر بس و يكفيني شره
لكن اثنينهم مو محصلتنهم

زوجي المحترم

ما يكتفي برجول على رجول الا لسان وش طوله ليش ما سويتين كذا و ليش ماصخ و ليش متأخره قايل لش دخلي المطبخ من وقت واحيانا قبل الاذان يهدر على شنو بتسوين السحور !! زوجي حبيبي ابو عيالي إرحم من في الأرض يرحمك من في السماء

مهما يقول

اني زوجي من النوع اللي يتشرط وما يدش المطبخ بس ارتاح لما هو ياكل ويعجبه الاكل بدون ما يتحلطم وتجي ناس عادي تساعد زوجاتهم

رجول على رجول طبعا نايم واني اكرف بالمطبخ بس بعدين اذا قعد يجيب ليي الاغراض اللي ابيها من بره

أكيد اساعده .. في المطبخ اهي تطبخ وانا أكل واهي تغسل وانا اشرب شاي .. الحمد الله متعاونين

لا يخلف جبدي بس يتأمر ويتنسه على كل شي وخاطره اطبخ ليه كل شي وشكرا

يد وحده ما تصفق

الحمدلله الكريم أنعم علي بزوج يساعدني ويده بيدي بكامل أشغال المنزل ومستحيل يتركني أشتغل بروحي واذا كان مشغول يسوي لو جزء بسيط ويقول ان هذا يريحه .. ما شاء الله و الله يخليه ليي ولعياله ولا يحرمنا من وجوده بيننا

صباحكم الخير
اني اهم شي عندي يجود الجهال عني لا يعيقوني في شغل المطبخ،و الا الطباخ كل يوم نطبخ و نقدمه و عليه بألف عافية ياكل من خيره و رزقه و اقدمه بحب و رغبة ليه و لاولاده،بس الجهال يمللون في المطبخ ههه.

افضل اعمال المرآة حُسن التبعل ، بارك الله فيكم

أنا زوجتي تطردني من المطبخ تقول أشاغبها وأتدخل في شغلها

ويش هالفتن !!

لا تخربون بيوت الناس ..ثم ما نبغي ناكل ولا ندخل المطبخ زين چذي

بس سي سيد يتأمر

رجلي بس تفلسف سوي هذا وسوي هذا وزيدي الكميه ويتشرط ويصير لصقه في المطبخ بس حق اشراف يحاتي بطنه وعقب الفطور يغسل ايده وينبطح على الكرسي حتى قلاص الماي ما يشيله...يا خلاف

خخخخخخخ ضحكتوني
لا والله اثنينهم رجول على رجول
والله يخلي امهاتهم الكبار
الي شايلين الثقل
هيه حدها لين بتسوي روحها حليوة ، بتشتري سمبوسة من ادنات مكان ، وبتجي تقليه يازعم مسوية انجاز

موضوع مع احترامي يسبب مشاكل .. حتى اللي زوجها ما يشتغل وياها يمكن تهاوشه وكذا لأن يزعم الصايم كل ما ليه زاغر وخلق احد ..

يعني الموضوع اللي قبل ما تسوي مشاكل

هههه

إشراف عام كالعادة

رجول على رجول وناكر للجميل

صباح الخير، ألحين كلش عاد الزوجة طول اليوم في المطبخ!؟ المفروض هل زوجش وأنتي كلا نايمة يقعدش أو يحط رجول على رجول ؟! قال ويش قال زوجة ومطبخ ، أمي مسكينة تطبخ وهيه نايمة وأذا أكلت وخلصت(أمك تفلت كلام عن الطباخ وتنغز) زين مادام حساسة راوينا الشطارة وسكتيها

أظن أنه أحنى في زمن المرة تقعد أرجول على ارجول والرجال يقعد يطبخ! خبركم عتيق! هالزمن النسوان أمسيطرين يتراوى ليي! والله أعلم! الرجال يخاف من المرة تستحرق واتسوي مشاكل ما تسوى عليه!

قصدكم نوم لأذان المغرب وبعد الفطور يختفي ومايرجع الا بعد السحور .. أقول مبارك عليكم الشهر والله يعوده علينا وعليكم بحال أفضل من هالحال..

اي و الله

احسن عشان تاخذين راحتش في الطلعات

لا غناتي وين اخذ راحتي بالطلعات والجهال في جبدي .. ماقول الا الله يعينا على الصيام بعد مانبي بعد كل هالتهب وحضرته يجي ياخذ الثواب

مبارك عليكم الشهر الكريم
يساعدني في شراء الأغراض وتجهيز طاولة الطعام وتذوق الأطباق عند الإفطار
ويسلم كل رب أسرة لعيالة

رجلي عيار حده ولا يسوي شي ولا بسوي. بس حضرته يتشرط ابغي جدي أو أفادي في هالطبخة وبس. كلهم جدي مافيهم خير

أنا أقول الزوج يطبخ والزوجة تروح الشغل بعدين (الزوجة رجول على رجول)

هو يشتغل برة في الحر والتعب، حبكت يدخل يساعدني ، دامه مو مقصر معاي واجبي اخدمه واريحه ، والمطبخ كلها طبختين والسلام يعني كلش عادي

وزوجي...

القهرر نايم للعصر ومن يقعد يتابع طبخات القصار وهو مايطبخ!!

أساعد ليش لا بس الموضوع اختياري

ويلي ويلي انزين كومو اشتغلو وصورو لينا الفطور ????