أحد منكم راح لبنان؟ أحد منكم يتابع أخبار هالأيام؟ شفتون ويش اللي صار في عمان؟ ليش عيَل حاطين علينا حطّة؟ ما شفتون الكهربه مالتهم انقطعت من أربعة أيام؟
«جونو» ضرب داك السبوع وما شافوا إلاّ الكهربه انقطعت عنهم، وما أحد سلاّها ولا بكلمة، بس انتون عافسين الدنيا عفاس، إذا انقطعت عنكم الكهربه يومين، سويتون مظاهرات ومسيرات واعتصامات! يعني إحنه اللي قاطعينها عنكم بالعماله؟ لو انتون السبب، كل واحد امركب له ثلاثة إيسيات في شقة صغيرة مثل القرقور، بعد لو عندكم شقق مثل الأوادم كم إيسي بتركبون؟
كلكم شفتون ويش اللي صار في عمان، احمدوا ربكم ما جانا «جونو»، لأن الله يحبنا، واللي صار في جو وعسكر والمعامير ما هو إلاّ عقاب إلهي بسيط علشان تراجعون أنفسكم وتقتصدون في الكهربه بالمستقبل، وما تقومون تشترون أشياء زايدة عن الحاجة، كل بيت مكيّف واحد يكفي، وما فوق الواحد إسراف وتبذير سيحاسبكم عليه رب العالمين، والمفروض تكونون زاهدين في الدنيا، لأن الدنيا كلها يومين. ليش كل بيت فيه كل هالشمسيات والبانكات والتريكات و(الاكزوزفانات)، مع غسالة وفرن وأوتي وثلاجة، هذا مو إسراف؟ لا ومركبين شمسيات دبل في الحمامات، والبعض مركب جرس للبيت، وبعض المتفلسفين يركبون جرس مع كيمرة، علشان يكتشفون اللصوص! من اللي بيسرق بيوتكم ياخيبة! وهل اللصوص راح يدخلون البيت من صوب الباب؟
كفاية حنّة وزنّة... مو انتون أول ولا آخر بلد تنقطع عنه الكهربه، حتى دبي اللي تفوشرون بها دائما، اللّعام انقطعت عنهم الكهربه في عز الصيف، وما شفنا صحافتهم سوّت هيصة على الوزير، وما أحد طالب باستقالته ولا تنحيته، ولا طلع لهم رسام كاريكاتير متفرغ سوّى له حملة لمدة عشرة أيام كله ضد وزارة الكهربه والماي، إلى ألحين مو اموقف من الرَسَام! كأنّه عنده قطوعه! انقطعت عنهم الكهربه يوم كامل وما احتج أهل دبي ولا أهل بر ديرة ولا الجافلية ولا زعبيل، كلهم صبروا فوفّاهم الله أجور الصابرين. بس انتون اللي تحنّون مثل النسوان العجايز!
مو بس دبي، حتى مصر، تنقطع عنها الكهربه والماي في الصيف، فما يعطلون روحهم وينزلون في النيل ويمشّون حياتهم. حتى العراق تنقطع عنهم الكهربه والماي 18 ساعة، ما يعطلون روحهم، بسرعة يصيرون فسطاطين: فسطاط ينزل دجلة وفسطاط ينزل الفرات، ناس عمليين مو مثلكم تقعدون تعقرون في وزارة الكهرباء وتثبطون همة العاملين فيها! وحتى أهل العمارة والبصرة والفاو كل واحد ينزل يتبرد بالشط، وما يعمل له هيصه ولا وجع راس على اخرطي! بس انتون الحنّانين اللي ما تحمدون ربكم!
حتى لبنان... أحد منكم راح لبنان؟ أكيد ثلاثة أرباع البحرينيين زاروا لبنان، في كل بناية فيها جنريتور، إذا انقطعت الكهربه اشتغل طوّالي. متعودين من أيام الحرب الأهلية وبعدها الاحتلال الإسرائيلي عشرين سنة، وبعدين حرب تموز، كل واحد مستأجر له جنريتور وممَشّي حياته، بس انتون تريدون الحكومة تخلّي ملعقة ذهب في حلوقكم ياللي ما تقولون الحمد لله!
كل العرب والعجم والهنود والباكستانية والبنغالية والفلبينيين... تنقطع عنهم الكهربه وما يقولون أف، بس انتون لو تنقطع عنكم ساعتين تسوونها وقعه! فكروا عدل... حتى لو انقطعت عشر أو حتى عشرين ساعة، ما راح تنقلب الدنيا وما راح تقوم القيامة، خل عندكم صبر اشوي، ما سمعتون الشاعر شنو يقول:
اشدد حيازيمك للحر فإن الحر لاقيك
ولا تجزع من الحر إذا حلّ بواديك
كما أضحكك البرد فإن الحر يبكيك!
إقرأ أيضا لـ "قاسم حسين"العدد 1738 - السبت 09 يونيو 2007م الموافق 23 جمادى الأولى 1428هـ
